Къарачай-Черкесияны кюню бла Черкесск шахарны 200-джыллыгъына аталгъан къууанч джыйылыу бардырылгъан кюн бизни республикагъа келген къонакъланы арасында Адыгея Республиканы Башчысы Мурат Кумпилов да бар эди.

КъЧР-ни Башчысы Темрезланы Рашид бла Мурат Кумпилов тюбешиб, эки республиканы экономикада, промышленностда, эл мюлкде, билим бериуде, маданият ишледе, республикаланы миллетлерини тин байлыкъларын сакълауда, башха санагъатлада да байламлылыкъларын бегитиуню сюзгендиле. Ала джаш тёлюге, аланы патриот сезимлерин ёсдюрюуге уллу эс бёлгендиле. Нек дегенде, ёмюрледен келген шохлукъну адетлерин сакъларыкъ ёсюб келген тёлюледиле.
Адыгеяны Башчысы Мурат Кумпилов Темрезланы Рашидни къарнаш республиканы баш саугъасы бла – «Слава Адыгеи» медаль бла – саугъалагъанды. Темрез улу бу кърал саугъа эки республиканы арасында джюрюген шохлукъну белгиси болгъанын чертгенди.
«Мени бу саугъагъа тыйыншлы кёргени ючюн, Мурат Кумпиловгъа разылыгъымы билдиреме. Мындан ары да бирге кёб проектни толтурулукъбуз деб ышанама. Къарачай-Черкесия бла Адыгеяны арасында байламлылыкъ юзюлмей, андан да кючлю боллукъду. Регионланы арасында не къадар къысха байламлылыкъ джюрюсе, Ата джуртубуз да ол къадар кючлю боллукъду», – дегенди Темрезланы Рашид.

 
{jcomments}