Бу кюнледе РФ-ны Президентини ШКФО-да Толу эркинликли келечиси Юрий Чайка бизни округда финансланы джорукъсуз джюрютюуге къаршчы кюрешни бардыргъан ведомствола арасы ишчи къауумну кенгешин бардыргъанды.

Видеоконференция халда бардырылгъан кенгешге Шимал Кавказ федерал округну башха регионларыны башчылары бла бирге Къарачай-Черкесияны Башчысы Темрезланы Рашид да къошулгъаны.
Видеобайламлылыкъны кючю бла связгъа джорукъ сакълаучу джергили органланы тамадалары да чыкъгъандыла. Кенгешде ведомствола арасында къысха байламлылыкъ джюрютюб, бюджет ачханы джораланнганындан башха ишлеге джойгъанланы ачыкълаугъа, тыйыугъа аслам эс бёлюрге кереклиси айырылыб айтылгъанды.
Юрий Чайка миллет проектлени толтуруугъа берилген ачханы тыйыншлысыча джоюлгъаны адамланы джашауларын игилендириу бла байламлы салыннган уллу борчланы толтуруугъа себеблик этгенин чертгенди.
Кенгешде айтылгъаннга кёре, бу джылны ал сюреминден бери Шимал Кавказ федерал округну регионлары бюджетден 134 миллиард сомну хайырландырыу бла байламлы 3,2 минг кесамат этгендиле.
«Ким болса да, къуллугъуна базыб, уллу ачханы файдалы хайырландырмай неда керекли затлагъа джоймай къояр деген къоркъуу барды. Алай болдурмаз ючюн, толтуруучу властны органлары да, джорукъ сакълаучу органла да, аланы ишлерине къарагъанла да келишиулю ишлерге, керекли информацияны бир-бирлерине терк джетдирирге керекдиле», – дегенди Юрий Чайка.
Бу ишни бусагъатда къалай баргъаныны юсюнден РФ-ны МВД-ны Шимал Кавказ федерал округда Баш управлениесини тамадасы Сергей Бачурин, Финанс мониторингни хакъындан федерал къуллукъну Шимал Кавказ федерал округда регионла арасы управлениесини тамадасы Алексей Русин, Федерал казначействону Ставрополь крайда управлениесини тамадасы Николай Мажаров, Къарачай-Черкесияны Башчысы Темрезланы Рашид, Ингуш Республиканы Башчысы Махмуд-Али Калиматов, Дагъыстан Республиканы Башчысы Сергей Меликов докладла этгендиле.
Къарачай-Черкесияны Башчысы Темрезланы Рашид 12 миллет проектге кёре къуралгъан федерал проектлени толтурур муратда бу джыл бизни республикада 41 регионал проект толтурула тургъанын айтханды.
«Аланы тамалларында къурулуш, джангыртыу ишле бардырыугъа, социал, инженер, джол инфраструктураны джарашдырыугъа, хайырландырыллыкъ кереклени сатыб алыугъа аталгъан кесаматла этилгендиле.
Бизни баш борчубуз, джорукъ сакълаучу органла бла иш джюрюте, адамланы джашауларын игилендирир муратда бегитилген кесаматла законну тамалында таймаздан толтурулурча этиудю», – дегенди Темрез улу.

 
{jcomments}