Къыркъаууз (сентябрь) айны 7-ден 10-на дери «Дружба народов Северного Кавказа» деген талай кюнню баргъан 33-чю велогонканы Къарачай-Черкесияда тёрт кёзюую бардырылгъанды.

Эришиулени биринчи кёзюую Черкесск шахарны ара майданында къыркъаууз айны 7-де, Республиканы кюню бла Черкесскени 200-джыллыгъы белгиленнген кюн, башланнган эди. Анда Эресейни ВМХ-фристайлдан спорт командасыны тренери Сергей Высоцкийни башчылыгъы бла ВМХ-фристайл шоу кёргюзюлгенди.
Экинчи кюн эришиулеге къошулгъанла Черкесскеден Пхия ауушха дери 133,4 километр джолну къоратхандыла. Джол къыйын болса да, аякъ машиналада баргъанла белгиленнген джерге джетгендиле.
Ючюнчю кёзюуде ала, Архызда 15 километрни таугъа чыгъыб, РАН-ны астрофизика обсерваториясына дери барыб, эришгендиле. Джангур джаууб, хауа болум къыйыныракъ болса да, спортчула иги кёргюзюмлеге джетгендиле.
Эришиулени Къарачай-Черкесияда ахыр кёзюую «Архыз – Черкесск» маршрутда ётгенди. Спортчула 119,6 километр джолну барыб, эришиулени тамамлагъандыла.
Къарачай-Черкесиядан сора спортчула Къабарты-Малкъаргъа атланнгандыла. Анда да эришиулени талай кёзюую ётерикди.
Айтыргъа, «Дружба народов Северного Кавказа» деген велогонка Шимал Кавказны тёрт регионунда, Адыгеяда, Краснодар крайда ётеди. Бу эришиуле Эресейни чемпионаты дараджада бардырыладыла.
Велогонка къыркъаууз айны 3-де Майкопда башланнган эди. Ол къыркъаууз айны 21-де Грозныйде тамамланныкъды.


Биченчиланы У.

 
{jcomments}