Бу кюнледе Шимал Кавказ кърал академияны Архызда базасында джаш тёлюню «Координата-2025» деген турист форуму ишин тамамлады. Алайгъа Шимал Кавказ федерал округдан 100 джаш адам баргъан эди.
Быйыл бу форум джаш тёлюню биринчи грант форуму болгъанды. Грант фонд 3,1 мелиуан сом эди. Проектлени джакълауну ахыр эсеблери кёргюзгенден, форумгъа къошулгъанладан 8 иш джетишимли джакъланнганды. Аланы 4-сю Шимал Кавказ кърал академияны студентлериникиледиле.
Конкурсда хорлагъанланы арасында:
«Региональная образовательная программа по обучению преподавателей в сфере STEAM «Будущее Сегодня 2.0» деген проекти бла (450 000 сом) Къазанлыланы Аслан; «Региональная школа развития молодёжи в сфере искусственного интеллекта «IТ-Импульс» деген проекти бла (363 000 сом) Джуккаланы Магомед; «Вершина» деген проекти бла (490 000 сом) Оздоев Мансур; «Настольная игра по сохранению национальных языков КЧР «Мост поколений» деген проекти бла (450 000 сом) Боташланы Арина; «Эко Поколение» деген проекти бла (355 000 сом) Середа Алёна; «Визуальная новелла «Самурай-Абрик» деген проекти бла (306 000 сом) Измайлов Мовсар; «Виртуальная экспедиция по Ингушетии» деген проекти бла (460 000 сом) Саутиева Марем; «Молодёжный медиа-центр «Матрица» деген проекти бла (290 000 сом) Джуккаланы Ибрагим болгъандыла. Джаш адамла кеслерини башламчылыкъларын джашаугъа киргизирге грантла аллыкъдыла. Хорлагъанланы проектлери окъуу бла, миллет тиллени сакълау бла, туристлик ишле бла, цифралы технологияла бла байламлыдыла.
Шимал Кавказ кърал академия 2023-чю джылдан бери бардыргъан «Координата» форуму бизни округну турист картасын кенгертирге джарарыкъ сейир сезимле туугъан площадка болуб бошагъанды. Быйыл форумну тамалында окъуу программала, практика сессияла, экспертле бла тюбешиуле эмда грант проектлени конкурсу бардырылгъандыла.
Узеирланы Хусей.




