Таурухлу джуртубузну сейир затларыны тизиминде Суфруджу чучхурла да бардыла. Ала Къарачай-Черкесияда атлары айтылгъан белгили сууладыла.
Тёгерекге кюмюш чача, къуюлуб келген эки чучхур Аманаууз ёзенде мийик Суфруджу тауну къабыргъаларындан, тиклеринден келген сууладан къуралгъандыла. Аланы кёрюрге излеген джай заманда, сууну кёб болгъан кёзюуюнде барса игиди. Ол заманда суу джылыныб, джууунургъа да болады. Къыш суу аз болуб, чучхурла бузлаб къаладыла.
Гитче Суфруджу чучхур 60 - 80 метр мийикликден къуюлса да, аны сууу азды, шоркъалары узунла, къысхала болуб агъадыла. Уллу 250 метр мийикликдеди, 350 метрге гитче чучхурдан арлакъдады. Алайлада тюрлю-тюрлю табигъат минералла кёбдюле. Ол тёгерекни ийнели терекледен къуралгъан чегетле джасайдыла. Былайда 250 метр мийикликлери болгъан къаяла бардыла. Экинчи чучхур, джангкъылычныкъылача бояула къурай, къаяны 100 метр мийиклигинден къызыу къуюлады, Доммайда уллу чучхурланы бирине саналады. Аны тауушу, ариу макъамы узакъдан эшитиледи. Ол ёзенни тюбюн джылтыратыб баргъан чыммакъ Аманаууз суугъа къуюлады.
Ючюнчю арлакъдады, анга «Джашырылгъан Суфруджу чучхур» дейдиле. Аны къачда, къыркъаууз (сентябрь), аууз-герги (октябрь) айлада, иссиле кетиб, салкъынлыкъ басыб, къарла эримеген заманда, Уллу Суфруджуну сууу аз болса, аны юсю бла ётюб, кёрюрге боллукъду. Ол Суфруджу бузну тюз къатындады.
Бу сейир чучхурла, адамланы кеслерине чакъыра, кюмюш макъам согъа, джумушакъ джырлайдыла. Акъ толкъунлары бир-бирин сюрюб ойнай, кёмюк этиб къайнайдыла. Ала, къонакъла бла джылы ушакъ эте, адамланы саулукъларын бегитирге, кюч-къарыу алыб керилирлерине себеблик этедиле.
Лепшокъланы Хусеин.




