Уллу джетишимлери бла миллетибизге, республикабызгъа сый-махтау келтирген спортчула кёбдюле. Аланы арасында къызланы кёрсенг, бютюн да бек къууанаса, ёхтемленесе. Аллайланы бириди Ючкекенден Кипкеланы Рашидни къызы Джамиля да. Каратэ бла кюрешген 13 джыл болгъан къызчыкъны аты бюгюнлюкде республиканы тышында да белгилиди.

Джамиля олимпия каратэни «WKF» деген тюрлюсю бла кюрешеди. Каратэни «KaZe xa», «WKS» тюрлюлеринде да къарыуун сынайды. Бокс бла кюреширге, футбол ойнаргъа да заман табады. Ол 250-ге джууукъ саугъаны иесиди, аладан 230-у алтын медалладыла.
Джамиля 13 джылында этген джетишимлери бла республикабызны джаш спортчуларына юлгюдю.
Джамиля 4 джыл болгъан кёзюуюнде тамада эгечини биргесине юрениулеге барыб къарагъанында, каратэни бек джаратхан эди. Алай бла, ол каратэ бла кюрешиб тебрегенди. Джамиля, юрениуледен сора юйюнде да бош турмай, санларын чыныкъдырыб тургъанды. 4,5 джылында Джамиля каратэден белибаугъа сынауладан ётерге излесе да, андан экзамен алыргъа унамайдыла. Джорукъгъа кёре, экзамен 6 джылдан алынады. Алай болса да, ол къаджыкъмай кюрешиб, джылы джетгенинде белибаугъа экзаменни джетишимли бергенди. Аны бла бирге, эм иги техника кёргюзгени ючюн, кубокга да тыйыншлы болгъанды.
Уллу эришиулеге Джамиля 6 джылында къошулуб тебрегенди. Эм алгъа ол Сочиде кърал дараджалы эришиуледе алтын медаль алгъанды. Андан сора Къазан, Тольятти, Санкт-Петербург, Уфа, Москва, Махачкъала, Анапа, Сухуми, Симферополь, Пенза, Евпатория, Каспийск, Дондагъы Ростов, Черкесск, Майкоп шахарлада бардырылгъан эришиулеге къошулуб, атын махтау бла айтдыргъанды. Бютеулей да ол олимпия каратэни «WKF» тюрлюсюнден кърал эмда халкъла арасы дараджалы эришиуледе 22 кере хорлагъанды. Аны бла бирге, ол каратэни «всестилевой» тюрлюсюнде 11 кере, «KaZe xa» тюрлюсюнде да Европа бла Евразияны кубогун 5 кере хорлагъанды. Айтыргъа, Джамиля бир айны ичинде 2 кере эришиулеге къошулуучанды.
2024-чю джыл Кипкелары юйдегилери бла Тюркню Аланья шахарында солугъан кёзюулеринде шахарда каратэден эришиуле ачылгъан эдиле. Джамиля ол эришиулеге къошулуб, алтын медаль алгъан эди. Джамиляны усталыгъына, къарыууна-кючюне багъа бере, Тюркню командасына къошулургъа да теджеген эдиле. Алай болса да, ол анда къалмагъанды.
Мындан алда Сухуми шахарда Евразияны кубогу бардырылгъан эди. Кипкеланы Джамиля, анга да къошулуб, 2 алтын медалгъа ие болгъанды. Ол эришиулеге барыргъа Джамилягъа Кипкеланы тукъумну тамадасы Исмагъил болушханды. Джамиля кеси, атасы-анасы да анга разылыкъларын билдиредиле.
Мындан ары да Кипкеланы Джамиля, уллу эришиулеге къошулуб, атын махтау бла айтдырлыгъына ышанабыз, анга уллу хорламла теджейбиз.

САЛПАГЪАРЛАНЫ Умар.

 
{jcomments}