Хыйлачыла 9 джыл болгъан къызчыкъны алдаб, аны атасыны ачхасын алгъандыла.

Черкесскеде джашагъан 4-чю классда окъугъан къызчыкъ кёбчюлюк хайырланыучу онлайн платформада ойнаргъа къызыннганды. Хыйлачы, аны бла байламлы болуб, къызчыкъгъа оюннга джараулу джалгъан (виртуальный) валюта теджегенди.
Аманлыкъчыгъа ийнаныб, сабий атасыны телефонундан аны счётуна 336 570 сомну ашыргъанды.
Бу хыйлалыкъны юсю бла Эресейни МВД-ны Черкесск шахар бёлюмюнде терслеу иш ачылгъанды. Бусагъатда полицияны къуллукъчулары сабийни ким алдагъанын ачыкълар мадарла этиб кюрешедиле.
Къарачай-Черкесияны багъалы адамлары! Аманлыкъчыла кёбчюлюк хайырланыучу оюн платформалагъа кирген сабийлени алдаргъа ёч болгъанларын билигиз. Эм алгъа ала, бонусла берген кибик этиб, сабийлени къызындырадыла. Артда уа, оюннга эслери кетген сабийлеге ачхагъа ары-бери затла теджеб, терилтедиле. Ангылары бегимеген сабийле да, не этгенлерин толу ангыламагъанлай, аталарын-аналарын ачхасыз къоядыла.
Ачхагъызны хыйлачылагъа аш этмез ючюн, сабийлеригизге айтыб ангылатыгъыз: танымагъан адамлары бла сетде байламлы болмасынла, не кёб ачха теджелсе да, энчи хапарларын кишиге бермесинле.
Сабийле интернет бла хайырланнган заманда уллула ала къаллай сайтлагъа киргенлерине, не этгенлерине эс бёле турсала дурусду.

КъЧР-ни МВД-ны пресс-къуллугъу.

 
{jcomments}