Джёгетей Аягъында 7-чи номерли лицейде КъЧР-ни окъуу бла илму министри Инна Кравченкону башчылыгъы бла «тёгерек стол» бардырылгъанды. Аны ишине 2025-чи джыл «Земский учитель» деген Бютеуэресей программада хорлагъан устазла да къошулгъандыла.

Аны кибик «тёгерек столгъа» муниципал къуралышланы окъуу бёлюмлерини тамадалары, школланы келечилери, программа бла кюрешгенле къатышхандыла.
Тюбешиуню баш мураты – ашхы сынам бла алмашыныу, окъуу-билим берген санагъатны алгъа элтиу, «земский» атны джюрютген устазланы ишлерин игилендириу.
Устазла элледе ишлерин къалай бардыргъанларындан, джангы методика джорукъланы дерслеге сингдириуню файдасындан, окъуу-билим бериуню дараджасын кёлтюрюуде этген атламларындан хапар айтхандыла.
«Тёгерек столну» программасында хайырлы кейслени презентациялары, бардырылгъандыла, устазлыкъ ишге усталаны илешдириуню джолларыны хакъындан айтылгъанды, мастер-классла кёргюзюлгендиле.
Устазла ачыкъ дерсле бардыргъандыла, алагъа къарагъан устазлагъа эмда 7-чи номерли гимназияны сохталарына XXI-чи ёмюрде кесине орун айыргъан окъуу-билим берген джорукъланы, проектлени хайырландыра билгенлерин танытхандыла.
– «Земский учитель» деген программа – гитче шахарла бла элледе ишлерге излегенлеге джол бериу болуб къалмай, джангы оюмланы, амалланы, окъуу системаны кёлтюрюуню кёзлеуюдю. Бизни борчубуз устазгъа кесин не джаны бла да кёргюзюрге, билген билимин сабийлеге толусу бла берирге мадар къурауду. Ол заманда сохталаны эмда джамагъатны ич дуниясы бай, кирсиз да боллугъуна ишек джокъду, – деб чертгенди Инна Кравченко.
Тюбешиуню аягъында быллай тюбешиулени таймаздан бардыргъанлай турургъа тыйыншлысы айтылгъанды. Устазла сынам бла алмашыннганлай, методика джорукъланы юсю бла окъуу-билим бериуню игилендиргенлей, заман бла тенг атлагъанлай турургъа тыйыншлыдыла.

 
{jcomments}