Къыркъаууз (сентябрь) айны 15-ден 21-не дери «Вся Россия – 2025» деген ат бла бусагъатдагъы журналистиканы форуму Сочиде болду. Ол быйыл XXIX-чу кере бардырылды.
Анга Эресейни бютеу регионларындан да, тыш къралладан да къошулгъан эдиле сёз чемерликни усталары. Хар не да таб къуралгъан джерде усталыкълары бла байламлы ишлени сюзюб, ашхы сынамлары бла алмашыр мадарлары болду аланы.
Форум башлагъаннган кюн анга къошулгъан журналистлеге Эресей Федерацияны Президенти Владимир Путин: «Багъалы шохларым! Сочиде бусагъатдагъы журналистиканы XXIX-чу форуму башланнганы бла алгъышлайма. Ма 30 джылгъа джууукъну бу форум Эресейни да, бизни бла шох къралланы да журналистлерин бирикдириб турады. Алай этилгенини себебинден, журналистика заманны излемине кёре алгъа барады», – деб джазылгъан телеграмма джиберген эди.
Президентни алгъышлау телеграммасын Эресейни Журналистлерини союзуну тамадасы Владимир Соловьёв «Зимний театрда» бардырылгъан къууанч джыйылыуда окъуду. Ол кесини атындан да къаламчылагъа форумну кёзюуюнде файдалы ишлерге алгъыш этди.
Айхай да, 7 кюнню ичинде бардырылгъан кенгешле, лекцияла, презентацияла, «тёгерек столла» журналистлени билимлерин ёсдюрюрге джарадыла. Анда аскер къаугъа бардырылгъан джерледе ишлеген корреспондентлени суратларындан, миллет газетледен къуралгъан кёрмючле да болдула.
Бизни региондан республикан газетлени баш редакторлары Къоркъмазланы Салима, Фардаус Кулова, Алтынай Атуова, Люсана Абидокова баргъан эдиле, ала ары джыйылгъан иш нёгерлерибизге Къарачай-Черкесияда чыкъгъан кърал газетлени кёргюзюб, сый-махтау табдыла.
«Форумну кёзюуюнде асыры кёб тюрлю иш бардырылгъандан, къайсы бирине къошулургъа да билмей эдик. Аланы Мария Ситтель, Арина Шарапова, Алексей Пушков, аны кибик башха белгили, сынамлы журналистле, кърал-джамагъат къуллукъчула, политикле бардыра эдиле. Ала бюгюнлюкде ишибизде джарарыкъ лагъымланы юслеринден айта эдиле. Бизни оюмларыбызгъа да эс бёле эдиле.
Бусагъат заманда миллет газетлеге тил байлыкъны сакълау бла байламлы уллу магъана берилгенин, адамла кеси тиллеринде берилген информациягъа бек ышаннганларын чертиб, бизни ишибизге бюсюреу эте эдиле. Алай бла, сынамыбызны алмашдырыб, ишибизге ёсюм алдырыргъа джараулу лагъымладан хапарлы болуб къайтдыкъ», – дейди «Къарачайны» баш редактору.
Къоркъмазланы Салима анда, бизни региондан джангыз кеси болуб, Эресейни Журналистлерини союзуну Федератив кенгешини къуру ышаннгылы адамла къошулгъан (закрытое заседание) джыйылыуунда да болгъанды. Анда Эресейни Журналистлерини союзуну тамадасы Владимир Соловьёв джыйылгъанланы баджарылгъан ишлени эсеблери бла шагъырей этгенди, алайда башха ишлеге да къаралгъанды. Дагъыда, ол джыйылыугъа къошулгъанла, чёб атыб, Дмитрий Головановну, Уставны бузгъаны ючюн, Журналистлени союзуну къурамындан чыгъарыргъа оноу этгендиле.
Аны юсюнден айта келиб, Къоркъмазланы Салима журналист не къыйын, табсыз болумда да ишин джууаблы баджарыргъа, джорукъгъа сыйыныргъа кереклисин чертди.
Ол айтхандан, форумну кёзюуюнде магъаналы ушакъла этилгендиле, сейир тюбешиуле болгъандыла. Къарачай-Черкесияны келечилери да, алагъа къошулуб, башха регионладан, къралладан иш нёгерлерибизни бизни республиканы СМИ-ни ишлеринден хапарлы этгендиле.
Алай бла, XXIX-чу «Вся Россия – 2025» деген форум къурамлы, файдалы ётгенди. Форумну джабылгъанына аталыб, Сочи шахарны «Зимний театрында» уллу къууанч джыйылыу болгъанды. Тюрлю-тюрлю эришиуледе хорламлы болгъан журналистлеге да анда сый, махтау берилгенди.
БАЙРАМКЪУЛЛАНЫ Зульфия.




