Бу кюнледе устазланы билимлерин ёсдюрген Къарачай-Черкес республикан институтда «Педагог-психолог – 2025» деген бютеу Эресейде бардырылгъан конкурсну регионал кёзюую болду.
Аны КъЧР-ни Окъуу бла илму министерствосу къурагъан эди. Ол ишге Къарачай-Черкес Республиканы окъуу бла илму министри Инна Кравченко къошулгъанды. Министр, джыйылыуну ишин ачыб, билим алыуну, бу джаны бла белгили усталаны юслеринден хапар айтыб, конкурсха къошулгъанланы сахнагъа чыгъарыб, алагъа махтау бериб, хар бирине мийик джетишимле теджеди.
Конкурсну баш мураты педагог-психологланы профессионал усталыкъларын кёлтюрюу, ала чыгъармачылыкъ кючлерин джашаугъа киргизирча мадарла къурау, республиканы билим бериу системасында психология къуллукъну белгили этиу эди. Конкурсха республиканы 7 муниципал учреждениесинден 7 уста къошулгъан эди. Ала, сахнагъа чыгъыб, иш нёгерлерини, конкурс комиссияны, экспертлени алларында мастер-классла кёргюздюле. «Педагог-психолог» деген конкурсну «Характеристика профессиональной деятельности», «Визитная карточка» деген сынамларындан ётдюле.
Конкурсну эксперт комиссиясы уллу сынамлары, билимлери болгъан къуллукъчуладан къуралгъан эди. Ала конкурсха къошулгъан хар адамны этген ишине эс ийиб къараб, тинтиб, багъа бердиле.
Биринчи орун Къобан райондан Дружба элни «Радуга» деген сабий садыны педагог-психологу Долаланы Светланагъа берилди. Ол, кесини терен фахмусун, мийик усталыгъын, сабийлеге сюймеклигин кёргюзюб, 1-чи оруннга ие болду. Энди Светлана къачда Къарачай-Черкес Республиканы атындан федерал дараджада Москвада бардырыллыкъ конкурсха къошуллукъду.
Экинчи орунну Черкесск шахарны «Полёт» деген 37-чи номерли сабий садыны психологу Джегутанова Марина алды.
Ючюнчю орун Черкесск шахарны 6-чы номерли сабий садыны педагог-психологу Джандарланы Анастасиягъа джетди.
Бу ишге къошулгъанла кеслерини сынамларын, фахмуларын, билимлерин кёргюздюле.
Лепшокъланы Хусеин.




