Адамны юйю, джери, улоуу дегенча мюлкю-рысхысы бара баргъанда бир тукъум бир сылтау бла джокъ болуб да къалады – чачылады, бузулады, адамдан неда табигъатдан хыянат джетеди. Алай болгъандан сора, аны орнундан тебмеген мюлкню реестринден кетерирге керек болады.

Росреестрни КъЧР-де бёлюмю билдиргенине кёре, закон бла «джашауу юзюлген» объектлени кадастр эсебден чыгъарыргъа тыйыншлыды неда аланы биринден бир джангы неда талай объект къуралгъанын да эсебге алыргъа керекди.
Чачылгъан неда от тюшген объектни кърал кадастр эсебден чыгъаргъан заманда ЕГРН-де регистрациягъа тюшген эсе, андан да кетерирге дурусду.
Ол джумуш объект бла байламлы актны тамалында этиледи. Аны, объектни тинтиб, кадастр инженер хазырлайды. Ол документ электрон халда кесине да электрон мухур урулуб джарашдырылады. Ол документде орнундан тебмеген объектни къурутулгъаныны юсюнден толу хапар айтады кадастр инженер.
Андан сора, объектни кадастр эсебден кетерир ючюн, кёб функциялы аралыкъгъа документлени табдырыргъа тыйыншлыды: тилек къагъытны, кадастр эсебден чыгъарылгъанына шагъатлыкъ этген документни. Тилек къагъытха объектни иеси неда аны ышаннган адамы къол салады, аны талай иеси бар эсе, хар бири да, къол салыб, тилек къагъыт джазаргъа керекди. Орнундан тебмеген рысхыны-мюлкню кърал реестринде объект, алай бла, эсебден чыгъарылыр, адамны да ол мюлкге иелиги тауусулгъаны бегир ючюн, кърал реестрге документлени табдырыргъа керекди: акт къагъыт; сюдюню бегими (объект кадастр эсебден сюдню юсю бла чыгъарылгъан эсе); адамны ол объектге эркинлиги болгъан къагъыт; адамны паспорту; ышаннгылы адам кюреше эсе бу иш бла, аны паспорту эмда ышанмакълыкъны бегитген къагъыты.
– Объектни кадастр эсебден чыгъаргъанын ЕГРН кесини къагъыты бла бегитеди.
«Орнундан тебмеген объектни юсюнден» деген реквизитде аны кадастр эсебден кетерилгени эмда къачан чыгъарылгъаны да джазылады, – деб ангылатханды Тамара Клычева, КъЧР-де орнундан тебмеген мюлк-рысхы бла байламлы кърал регистрация бёлюмню тамадасыны орунбасары.
Алайды, адам къралда джюрюген закондан хапарлы болуб, ишин анга кёре баджарса, кесине да, къралгъа да тынч этерикди.

Маралланы Ина.

 
{jcomments}