Къарачай-Черкесияны энтда курортла бла байламлы бир хорламы болду – «Архыз» курортда Эресейде эм мийикде орналгъан хауада тургъан аякъ кёпюр ишленнгенди.

Кюн ариулада алайдан Кавказны таурухлу джерлерин, Минги Тауну кюмюш тёппелерин да кёрюрге боллукъду.
– «Архыз» курортда туристлеге аламат саугъа этилгенди. Къралда эм мийикде орналгъан хауада тургъан аякъ кёпюр хайырланыугъа теджелгенди. Бу сейирлик къурулуш «Орбита» чынды джолну баш станциясында орналгъанды. Ол тенгизни дараджасындан 3030 метр мийикликдеди, кеси да джангы мийик тау экстрим-паркны сейирликлерини бириди, – деб хапар айтхандыла «Архыз» курортну пресс-къуллугъунда.
– Архыз бу кёпюрю бла рекорд салгъанды, – дегенди курортну баш директору Роман Киранчук.
Аны официал халда тау лыжа сезон башланыргъа ачар мурат барды. Курортха келген къонакъла 100 метр узунлугъу болгъан хауада тургъан аякъ кёпюрде ары бла бери джюрюрге боллукъдула. Ары уллула, сабийле да къоркъмай минерикдиле – аны иш этиб джарашдырылгъан страховка системасы барды. Алайды да, 2025-чи – 2026-чы тау лыжа сезонда солургъа «Архыз» курортха келгенлени кёб сейир зат сакълайды. Аланы бири Эресейде эм мийикде орналгъан хауада тургъан аякъ кёпюрдю. Аны юсюнден тёгерекни тауун, сууун, чегетин, ёзенин, тюзюн да, къол аяздача, кёрюрге боллукъду.

 
{jcomments}