Къарачай-Черкесияны Миллет ишлерини, кёбчюлюк коммуникациялары бла басмасыны хакъындан министерствосуну башламчылыгъы бла къыркъаууз (сентябрь) айны 29-да Доммайда «Межкультурный диалог – 2025» деген джаш тёлю форум башланнганды.

Форумну ачылгъанына аталгъан джыйылыугъа КъЧР-ни муфтийи Эриккенланы Мухаммат хаджи, протоиерей Евгений Субтельный, Миллет ишлени хакъындан федерал агентствону Шимал Кавказ федерал округга, Кърымгъа эмда Севастополгъа къарагъан регионла арасы управлениесини тамадасыны орунбасары Илья Гусев, КъЧР-ни сабий омбудсмени Алакъайланы Мария, Алийланы Умар атлы Къарачай-Черкес кърал университетни ректоратында кенгешчи Ёзденланы Таусолтан, КъЧР-де МВД-ны экстремизмге къаршчы кюрешни бардыргъан аралыгъыны тамадасыны орунбасары Эльдар Багов дагъыда башхала къошулгъандыла.
Республиканы Башчысыны атындан джыйылгъанлагъа КъЧР-ни миллет ишлерини, кёбчюлюк коммуникациялары бла басмасыны хакъындан министри Мурат Есенеев хошкелди айтханды. Министр бютеу Шимал Кавказны регионларындан форумгъа къошулгъан джаш адамла бизни регионда заманларын файдалы ашырлыкъларына, джангы шохла къурарыкъларына ышаннганын чертгенди.
«Башхаладача болмай, бизни къралда хар миллетни келечисине да, хар дин ахлугъа да ёсюм алыргъа джол ачыкъды. Хар бирибизини да эркинлигибиз кърал дараджада джакъланады. Башхача айтсакъ, Эресей Федерацияны кючю бизни энчилигибизни сакълай, бирикдиреди.
«Межкультурный диалог» деген ат бла бардырылгъан форумда сиз билимигизни ёсдюрюрсюз, энчи оюмларыгъызгъа эс бёлдюрюрсюз, халкъла арасы шохлукъну бегитирсиз деб, ийнанама», – дегенди Мурат Мухарбиевич.
Кертиси да, къонакъла да, бизни республиканы джаш адамлары да форумну кёзюуюнде бир-бирлерини маданиятлары бла шагъырей болгъандыла, магъаналы темалагъа ачыкъ ушакъла этгендиле, джангы шохла къурагъандыла.
«Межкультурный диалог – 2025» деген джаш тёлю форумну тамалында патриотлукъгъа, ксенофобияны профилактикасына, экстремизмден, терроризмден сакъланыугъа аталыб да бек кёб иш бардырылгъанды.

СОЛТАНЛАНЫ З.

 
{jcomments}