Аскер къаугъаны ветераны Алексей Колесников, социал кесамат джарашдырыргъа болушлукъ излеб, «Защитники Отечества» деген кърал фондну Къарачай-Черкесияда филиалына баргъанды.
Алексей 2019-чу – 2021-чи джыллада кесаматны тамалында аскер къуллукъда болгъанды. 2022-чи джыл байрым (февраль) айны 26-да СВО бардырылгъан джерге ашырылгъанды. Анда бир джылдан асламны къуллукъ этгенинден сора башына бош болгъанды.
«Защитники Отечества» деген фондну координатору Алексейге социал кесамат джарашдырыргъа керекли къагъытланы джыяргъа болушханды, социал джакълыкъ этген органнга биргесине баргъанды. «Защитники Отечества» фонд бла Хабез районну урунуу бла социал ёсюмюню хакъындан управлениеси къысха байламлылыкъда ишлегенлери себебли, Алексей социал кесамат джарашдыргъанды.
«Мен аскер къуллукъдан къайтханымда, не бла кюреширге билмей эдим. «Защитники Отечества» деген фондха баргъанымда, Социал координатор къагъытла джыяргъа, кеси башыма ишлегеними (самозанятый) эсебге тюшюрюрге, социал кесаматха тилек къагъыт берирге болушду. Бизге, ветеранлагъа, не джаны бла да кёлтюргючлюк этиб, аякъ юсюне сюелирге болушханлары ючюн, фондну къуллукъчуларына разылыгъымы билдиреме», – дейди Алексей Колесников.
Айтыргъа, «Защитники Отечества» деген фондну бизни регионда филиалы КъЧР-ни Правительствосуну, шахарланы, районланы администрацияларыны болушлукълары бла аскер къаугъаны ветеранларына, аланы юйдегилерине не джаны бла да болушлукъ этгенлей турады.




