Бу кюнледе, Уллу Хорламны 80-джыллыгъына аталыб, Тебердиде Шимал Кавказда кеси разылыкълары бла сууаблыкъ ишле этгенлени (доброволец) джыйылыулары ётгенди.
Округ дараджада быллай джыйылыу биринчи кере бардырылгъанды. Анга Шимал Кавказны регионлары бла Абхазиядан кеси разылыкълары бла сууаблыкъ ишле этген бирлешликлени келечилери, бютеулей да 80-дан аслам адам, къошулгъанды.
Джыйылыу тёрт кюнню баргъанды. Аны кёзюуюнде джаш адамла стратегия сессиялагъа, дискуссиялагъа, окъуу програмалагъа, джарыкълыкъ эмда патриот ишлеге къошулгъандыла. Ала Уллу Ата джурт къазауатны джылларында совет халкъны джигитлигине аталгъан оюнла, тарих квестле, акцияла да къурагъандыла. Джыйылыуда къазауатны кёзюунде эм баш урушланы бирине – Кавказ ючюн урушха – уллу эс бёлюннгенди.
Джыйылыуну эсеблерине кёре анга къошулгъанла талай патриот иш къурарыкъдыла. Ала Къарачай-Черкесияда толтуруллукъдула.




