Бу кюнледе КъЧР-ни Башчысы Темрезланы Рашид РФ-ны Вице-премьери Дмитрий Чернышенкону башчылыгъы бла 2026-чы джылгъы саулукъ сакълау кампанияны эсеблерин сюзюуге эмда 2027-чи джылгъа борчланы белгилеуге аталгъан кенгешге видеоконференция халда къошулгъанды. Ол кенгешде РФ-ны билим бериуню хакъындан министри Сергей Кравцов да болгъанды.

Анда айтылгъаннга кёре, быйыл джай кёзюуде Эресейде 6 мелиуаннга джууукъ сабий иги солуб, саулугъун бегитгенди. Джайгъы лагерледе солугъанланы 40 проценти саулукъларында къыяулары болгъан сабийледиле.
Бу иш мындан ары да бардырыллыкъды. Кенгешде этилген оноугъа кёре, келир джайда сакъатла бла бирге саулукълу сабийлени да иги солутур мадарла этилликдиле. СВО-гъа къошулгъанланы сабийлерине, ёксюзлеге, къыйын болумда джашагъанлагъа айырыб эс бёллюкдюле.
Кенгешде джай сабийле солуучу джерледе инфраструктураны джангыртыргъа эмда къоркъуусуз этерге кереклисини юсюнден да сёлешиннгенди, аны кибик вожатыйлени хазырлаугъа, сабий, джаш тёлю эмда патриот бирлешликле бла байламлылыкъ джюрютюуге да эс бёлюрге кереклиси да чертилгенди.
Темрез улу МАХ-да кесини каналында джазгъаннга кёре, сабийлени солутуугъа аталгъан кампания бизни республикада джетишимли бардырылады. Озгъан джай кёзюуде бизни регионда 12 минг сабий зауукълу солурча мадарла къуралгъандыла. СВО-гъа къошулгъанланы сабийлерине да, сакъат сабийлеге да айырыб эс бёлгендиле. Аны тышында да, адетдеча, ЛНР-ни Старобельск округундан сабийле да бизни республикада солуб кетгендиле. Эресейни халкъларыны бирлигини джылында эмда КъЧР-ни халкъларыны тин-иннет эмда маданият байлыкъларыны джылында лагерледе сабийле, зауукълу солугъан бла къалмай, Къарачай-Черкесияны, бютеу Эресейни, халкъларыны адетлери, маданиятлары бла да шагъырей болгъандыла.

 
{jcomments}