Билим бериу санагъатда ишлегенлени республикан профсоюз организациясы «Учителя Победы» деген бютеу Эресей дараджада бардырылгъан акцияны ишине къошулгъанлай турады.

Профсоюзла, сабийле аскерчилени къазауатда кёргюзген джигитликлерини, тылда махтаулу уруннганланы юслеринден билгенден сора да, устазла Уллу Ата джурт къазауатны заманында, адам тёзелмазча болумда сабийлени окъутуб, алагъа билим берген бла къалмай, игиликге, ашхылыкъгъа юретиб тургъанларыны юсюнден хапар билирге кереклилерин баш ишлерини бири этиб, кюрешгенлей турадыла. Аны бла байламлы республиканы школларында тематикалы дерсле бардырадыла.
Бу джол аллай дерс Черкесскени орта билим берген 3-чю номерли школунда болду. Аны тарих бла обществознаниени устазы, Билим бериу санагъатда ишлегенлени профсоюзларыны республикан организациясында джаш устазланы советини тамадасы Джуккаланы Джамиля бардырды.
«Бу акция тарих эсгериуню тамалында бардырылады. Сабийле бизни тарихибизде Уллу Ата джурт къазауатны заманында болгъан затланы юсюнден билирге керекдиле. Джылла оза, ала унутула барадыла. Уруш этген джигитлени тизиминде устазла да болгъандыла, ала къазауат этгенден сора да, сабийлеге билим бергенлей тургъандыла. Джашла бла къызлагъа игиликни, ашхылыкъны, эркинликни, Уллу Хорламны магъанасын ангылатхандыла. Бюгюн бардыргъан ишибиз ол зат унутулмазча, эсде турурча мадарла къурайды», – деди ол.
10-чу – 11-чи классланы сохталары, 5 къауумгъа юлешиниб, къазауатны юсюнден белгиленнген киногъа къараб, аны сюзедиле. Устазлары алагъа соруула соруб, ала билгенлерине джууаб бериб, билмегенлерин да бир-бирине, устазларына соруб, ушакъ халда хапар айтадыла. Джашла бла къызла эслерин ийиб кёб затны джангыдан ангылайдыла.
Быллай ашхы ишле, тюрлю-тюрлю халкъланы келечилерини арасында шохлукъну, бирикмекликни, ангыламакълыкъны кючюн бегитирге да энчи юлюш къошадыла.

(Бизни корр.).

 
{jcomments}