Мындан алда «Навигаторы детства» деген проектни толтуруу бла кюрешген эки устазыбыз бирден «Знание. Наставники» деген бютеу Эресей конкурсунда хорлагъандыла.

Аны «Знание» деген джамагъат бирлешлик «Наставник-советник» деген къауумгъа джоралаб бардыргъанды.
Конкурсну тамалында онлайн халда окъуу программала, устазланы портфолиоларын къурау, устазланы тюрлю-тюрлю табсыз болумладан чыгъаргъа юретиу дегенча ишле да бардырылгъандыла.
Конкурсха Эресейни 89 регионундан 15 минг заявка берилгенди. Сайлауну биринчи кёзюуюнде теджелген сынауладан 3 минг адам ётгенди. Ала конкурсну экинчи кёзюуюнде да кеслерини фахмуларын, билимлерин, сынамларын, юретиу кючлерин, акъыл бериулерин кёргюзтюрча мадар табхандыла.
Экспертле конкурсха къошулгъанланы усталыкъларына, джетишимлерине, теджелген ишлени къалай баджара билгенлерине багъа бергендиле. Алай бла, бизни республикадан Гебенланы Пилялны джашы Джашарбек «Лучший наставник в системе среднего профессионального образования» деген номинацияда, Батчаланы Карина, Хыйсаны къызы да, «Лучший наставник общеобразовательной организации» деген номинацияда 1-чи орунланы алгъандыла.
Жюри ала кёргюзген устаз лагъымланы башха окъуу учреждениеледе да хайырландырыргъа боллукъгъа санаб, экисине да уллу махтау бергенди.
Джердешлерибизни бу джетишимлери бла алгъышлай, алагъа мындан ары да уллу джетишимле теджейбиз.

(Бизни корр.).

 
{jcomments}