Бюгюнлюкде къарачай джазыучуланы ичинде эм фахмулуланы бири Хубийланы Хызырны джашы Исламды десек, джангыллыкъ болмазбыз.
Бу кюнледе аны Эресей Федерацияны Джазыучуларыны союзуна членнге алгъанлары да шагъатды анга. Ислам къарачай, орус тилледе да бирча джазады. Хубий улуну юсюнден айтыла тургъанды, чыгъармаларын да миллет окъугъанды, таныйды, биледи. Алай болса да джашауундан, творчествосундан бир къауум затланы эсигизге салайым.
Ол 1976-чы джыл Красногор станседе туугъанды. Анда орта школну бошагъанды. Юристликден, экономика илмуладан баш билими барды. Къаламны къолуна алгъанлы иги кесек заман озса да, тартына туруб, арт джыллада чыгъара башлагъандыла джазгъан затларын. Аны хапарла бла илму статьяладан къуралгъан биринчи «Къадар» деген китабы орус тилде 2015-чи джыл басмаланады. Анга окъуучула джылы тюбедиле, 2016-чы джыл а ол китаб ючюн КъЧР-ни Башчысыны адабият бла санатдан ёчю бериледи. Ызы бла «Умут» деб, ана тилибизде экинчи китабы да чыкъды. Аланы экисинде да автор адамлыкъ шартлагъа, адебге-намысха, кёчгюнчюлюкню ууу бла миллетге джетген къыйынлыкълагъа, сейирлик джерибизге, къазауатда джигитлик этген джашларыбызгъа баш магъана береди. Кимни да сагъайтхан бу темалагъа окъуучула да айырыб эс бёледиле. Бусагъатда ючюнчю китабын хазырлай турады.
Эндиге дери Исламны суратлау чыгъармаларын республикада окъуй эдиле. Мындан ары аны творчествосу бла саулай Эресей да шагъырей боллукъду. Къралда «Культура России 2012-2018 г.г.» деб федерал программа бар эди. Аны тамалында сабийлеге, уллулагъа аталгъан поэзия, проза антологияны да эки китабы чыкъгъан эдиле. Мындан алда ючюнчю китабы да 50 тилде басмаланды. Анда 115 автор барды. Къарачай тил деген бёлюмюнде Хубий улуну тогъуз хапары чыкъгъанды.
Исламны джазыучулукъ ишине да талай затны къошмасакъ, хапарыбыз толу боллукъ тюлдю. Ол 2013-чю джылдан бери КъЧР-ни Миллет ишлени, кёбчюлюк коммуникацияла бла басманы юслеринден министрини биринчи орунбасы болуб турады. 2008-чи джыл «Кадровый резерв - Профессиональная команда страны» деген проектни лауреаты болгъанды. Андан сора «Бирлешген Эресей» партияны Баш советини бегими бла Къарачай-Черкесияда ол проектни Регионла арасы координатору этгендиле. Репрессиягъа тюшген халкъланы юслеринден отуздан артыкъ илму иши газетледе, башха кёбчюлюк информациялада басмаланнганды. Къарачайда биринчи джамагъат организацияланы юслеринден диссертациясы да хазырды.
Кърал, джамагъат къуллукълагъа тири къошулгъаны ючюн берилген саугъалары да кёбдюле. 2018-чи джыл Миллет ишлени хакъындан Эресейни Федерал агентствосуну Сыйлы грамотасын алгъанды. 2016-чы джыл Шимал Кавказда Муслиманланы координацион аралыгъыны «За заслуги перед Уммой II степени» деген орденине тыйыншлы болгъанды. Аны ызы бла «Союз казаков» деген Бютеуэресей джамагъат бирлешликни эмда Къарачай-Черкес Республиканы Муслиманларыны дин управлениесини медаллары бла саугъаланнганды.
Кёб тюрлю санагъатда энчи ыз къоя баргъан фахмулу, билимли джашха мындан ары да тутхан ишлеринде джетишимле теджейбиз эмда Эресей Федерацияны Джазыучуларыны союзуна член болгъаны бла да таза джюрекден алгъышлайбыз.
АППАЛАНЫ Билял.
