Алтотур (март) айны 21-де КъЧР-ни Башчысы Темрезланы Рашид Федерал джол агентствону тамадасы Роман Новиков бла тюбешгенди.
Тюбешиуде Къарачай-Черкесияда джол къурулушха ёсюм алдырыуну юсюнден сёлешиннгенди.
Джыл сайын республикада джолланы игилендириу бла байламлы кёб иш этиледи. Сёз ючюн, 2021-чи джыл Къарачай-Черкесияда 25 километрден артыкъ федерал джол тёрт полосагъа дери кенгертилгенди.
Федерал джолну Пятигорск шахарны джанындан Черкесскеге кирген джеринден Ленин атлы орамгъа дери кесегине («Лермонтов-Черкесск» джолну 77-чи-89-чу километрине дери) эмда кёпюрден Садовое элге айланнган джерге дери кесегине тамамлы ремонт этилгенди.
Быйыл арттотур ( ) айда Р-217 джолну Черкесскеге кирген джерини 12 километрин (Садовое элге айланнган джерден республикан аралыкъда Ставропольская, Набережная орамла бир-бирлерине къошулгъан джерге дери кесеги) тёрт полосагъа дери кенгертиб башларыкъдыла.
Тюбешиуге къошулгъанла чертгенден, джолну ол кесегине ремонт этилсе алайы бла кёбюрек машина джюрюрча боллукъду, джолда къоркъуусузлукъ да ёсерикди. Джолну арасы бла джол «буруула» салынныкъдыла, кече джарытхан чыракъла да джарашдырыллыкъдыла.
Черкесск шахарны тышы бла баргъан, «Лермонтов-Черкесск» эмда «Черкесск-Домбай-граница с Республикой Абхазия» деген джолланы байлагъан машина джолну къурулушу бла байламлы проектни да сюзгендиле тюбешиуде.
КъЧР-ни Башчысы Федерал джол агентствону тамадасы Роман Новиковгъа республиканы джол сетлерин ёсдюрюу эмда джарашдырыу ишде болушлукъ этгени ючюн разылыгъын билдиргенди.
