Алтотур (март) айны 23-де КъЧР-ни VI-чы кере сайланнган Халкъ Джыйылыууну (Парламентини) депутатларыны кёзюулю 36-чы сессиясы ётгенди. Аны Парламентни Председатели Александр Иванов бардыргъанды. Сессияны ишине КъЧР-ни Башчысы Темрезланы Рашид да къошулгъанды.
Сессияны кёзюуюнде депутатла 12 сорууну сюзгендиле. Аланы арасында КъЧР-ни ич ишлерини министри Олег Мальцевни 2021-чи джыл МВД-ны джамагъат джорукъну, къоркъуусузлукъну баджарыу бла байламлы бардыргъан ишлерини юслеринден отчётуна уллу эс бёлюннгенди.
Министр чертгенден, озгъан джыл республикада аманлыкъ ишлени саны 6,9 процентге азайгъанды. Джорукъ сакълагъан органланы баш борчларыны бири аманлыкъ ишлени ачыкълауду. Аланы арасында урлау-тонау, хыйлалыкъ, наркотиклени законсуз джюрютюу, экономика джаны бла аманлыкъ ишле аслам орун аладыла. Машиналаны урлау, миграцион санагъатда законну бузуу дегенча ишле азыракъдыла.
Олег Мальцев МВД-ны ишини юсюнден толу хапар айтханды. Отчётун тамамлагъанындан сора депутатланы сорууларына джууаб бергенди.
Парламентни депутатларыны бегими бла КъЧР-ни ич ишлерини министрини отчёту эсебге алыннганды.
Ызы бла Олег Мальцев РФ-ны ич ишлерини министри Александр Колокольцевни атындан КъЧР-ни Башчысыны эмда Правительствосуну Администрациясыны тамадасы Озов Муратха РФ-ны МВД-ны «За вклад в укрепление правопорядка» деген медалын бергенди.
КъЧР-ни Башчысы Темрезланы Рашид джорукъ сакълау ишлерин бет джарыкълы баджаргъанлары ючюн Олег Мальцевге эмда МВД-ны къуллукъчуларына разылыгъын билдиргенди. Темрез улу республиканы шахарларыны, районларыны администрацияларыны башчыларына полиция къуллукъчула бла къысха байламлылыкъда ишлерге кереклисин да айтханды.
КъЧР-ни Халкъ Джыйылыууну Председатели Александр Иванов да депутатланы атындан КъЧР-ни МВД-ны къуллукъчуларына разылыгъын билдире, Парламент бла полицияны арасында эртдеден бери джюрюген къысха байламлылыкъ кючлю болуб, джорукъ сакълагъан органла теджеген законлагъа эс бёлюннгенлей турлугъун чертгенди.
Андан сора депутатла «О внесении изменений в Закон Карачаево-Черкесской Республики «О республиканском бюджете Карачаево-Черкесской Республики на 2022 год и на плановый период 2023 и 2024 годов» деген законну проектин сюзюб, къабыл этгендиле.
2022-чи джыл республикан бюджетге ызына къайтарылмазлыкъ (безвозмездно) 1 416 110,0 минг сом тюшериги белгиленнгенди. Алай бла быйыл бюджетге бютеулей да 34 091 363,1 минг сом хайыр тюшерикди.
Алайды да, КъЧР-ни Саулукъ сакълау министерствосуна коронавирус бла ауруб, саулукъларын амбулатор халда бакъдыргъанланы дарманла бла баджарыугъа, медицина-санитар болушлукъ табдырыугъа, медицина оборудование эмда «Терк болушлукъ» машинала алыргъа ачха бёлюннюкдю.
КъЧР-ни Маданият министерствосуна джарыкълыкъ ишлени бардырыргъа, КъЧР-ни Окъуу бла илму министерствосуна школланы джангы окъуу керекле бла баджарыргъа, ана тил бла адабиятдан ал башланнган классланы окъуу китабларын федерал тизимге къошаргъа, орта усталыкъ берген окъуу учреждениелени терезелерин ауушдурургъа, КъЧР-ни Физкультура бла спорт министерствосуна «акъыллы» спорт площадкаланы къурарча оборудование алыргъа, КъЧР-ни Эл мюлк министерствосуна селекцияда, гардош урлукъ ёсдюрюуде илму-техника проектлени толтурургъа, эл мюлк культураланы буз ургъандан сакълаугъа, КъЧР-ни Къурулуш бла фатар-коммунал мюлкюню министерствосуна школлагъа тамамлы ремонт этерге эмда проект-смета къагъытланы хазырларгъа, регионал, муниципал джолланы джарашдырыугъа, Ата джурт къазауатны ветеранлары джашагъан юйлеге ремонт этерге, КъЧР-ни Урунуу бла социал ёсюмюню министерствосуна къарт адамлагъа эмда сакъатлагъа джораланнган республикан юйню-интернатны джангы керекле бла баджарыугъа ачха берилликди.
Алай бла 2022-чи джыл республикан бюджетден бютеулей да 35 679 396,8 минг сом джоюллукъду.
Дагъыда талай республикан закон федерал законлада тюрлениуле болгъанлары бла байламлы джарашдырылгъанды.
САЛПАГЪАРЛАНЫ Умар.
