Къарачай-Черкесияда цемент эмда къурулуш материалла чыгъаргъан эм уллу заводланы бири «Евроцемент груп» АО продукциясын аслам этиб тебрегенди.
Айтыргъа, асыулулугъу бла Эресейде айтылыб тургъан ЦЕМ I 42,5H портландцементни чыгъарыб башлагъандыла былайда. Къурулуш санагъатда цементни бу тюрлюсюне излем уллуду.

Сёз ючюн, ЦЕМ I 42,5Н портландцемент деменгилиге саналады, дженгил къатады, аны себебли бетон конструкциялагъа къошакъ джылыу джетдирирге керек болмайды. Аны бла да къалмай, ол темир формала бла да азыракъ хайырланыргъа мадар береди.
Цементни джангы тюрлюсю моноблок бетон затланы этген заманда бек изленеди, нек десегиз, баджарылгъан ишни болджалын къысхартыргъа джарагъан бла къурулушну дженгиллетеди.
Алайды, бизни къралгъа тышындан санкцияла салыннганлыкъгъа, Къарачай-Черкесияны промышленность предприятиелери джунчумазлыкъларын танытхандыла. Чыгъарылгъан продукцияны агъачлыгъы, саны да ёсюмню джолунда барадыла.