Юй керекни юсюнден
1) Ингирге дери ойнайма да,
Ингирде мюйюшге къысылама.
2) Не барама, не барама,
Бир атлам аллыма баралмайма.

3) Бир къызым барды да:
Халкъны кийиндиреди да,
Кеси къымыжалай къалады.
4) Эшик артында - къошбаш теке.
5) Бир кючюгюм барды да,
Ол чайнамагъан кийим джокъду.
6) Кёкден келир кёк ала,
Бойну болур чубар ала,
Къулагъына бармакъны урсанг,
Ауузу ачылыб къала.
7) Ауузун ачар, алыб къачар.
Отджагъада - бир киши,
Ауузунда - эки тиши.
8) Суугъа тюшсе - кёмюк,
Суудан чыкъса - кемик.
9) Бир къызым барды да,
Тепсесе - семиз болады.

Сауутланы юслеринден
10) Ол - кёкге къарай,
Эл - анга къарай.
11) Атха минмез,
Джаяу джюрюмез.
12) Бир ёгюзюм барды да,
Бойнун бурмай, суу ичмейди.
13) Джанынгдан кетмез,
Суусаб этмез.
14) Бара-бара - джырлай бара,
Келе-келе - джылай келе.
15) Юч къарнашны - бир бёркю.
16) Узунбоюн Даусхан - къазандагъын тауусхан.
17) Ауузу бла иче да,
Бурну бла тёге.
18) Палапан аякълы,
Палпуч тырнакълы,
Сюрюб джеталмазса,
Тутуб тыялмазса.
19) Аягъы джокъду - джюрюйдю,
Тили джокъду - сёлешеди.

***
1) Бир элден бир элге келин келгеннге алгъышха баргъан бир къатын аллына тюбеген бир къызчыкъгъа:
- Юйюгюзге чаб да, мени келгеними айт, - дегенди. Къызчыкъ да анга:
- Ким келеди дерикме? - деб соргъанды.
- Ананга - эгечинг келеди де, атанга - келининг келеди де, - дегенди къатын.
Алай къалай болгъанды, аны джууабы неди?

2) Бир джолда, хоншу тиширыу хоншусуна келиб, къызчыкъларындан сора кишини кёрмегенинде:
- Атанг-ананг къайры кетгендиле? - деб соргъанды.
Къызчыкъ анга джууабха:
- Атам сегизаякъгъа миниб, эл ичине, анам да тынмазгъа кетгендиле, - дегенди.
Сегизаякъ бла тынмаз недиле?

3) Бир киши, ёле тебрегенинде джашына:
- Къатын алсанг, къулагъы сангырау, тили тилсиз, кёзлери сокъур, къоллары чолакъ, бутлары бечелни ал, - деб осият этгенди.
Къаллай къызгъа айтханды ол алай?

4) Эки къатын бирер къызлары бла джолда 3 алма табхандыла.
Юлешгендиле да, бирерине бирер алма джетгенди.
Къалай болгъанды алай?

5) Бир къызгъа:
- Къарнашларынгдан, эгечлерингден къайсыла кёбдюле? - деб соргъанларында.
Ол:
- Къарнашларым эгечлеримден 3 кере кёбдюле, - дегенди.
Джашха соргъанларында уа:
- Эгечлерим да, къарнашларым да тенгдиле, - дегенди.
Эгечле бла къарнашла башха-башха ненчадыла?

Элберлеге тюз джууабланы редакциягъа билдирсегиз, бек разы боллукъ эдик. Ол адамланы атларын да басмалаб, окъуучуларыбыз бла шагъырей этерикбиз.

Берилген элберлеге тюз джууабланы газетибизни келир номеринде басмаларыкъбыз.