Джаш тёлюбюзде атларын айтдыргъан чемер, фахмулу къызларыбызны юслеринден да айтыргъа тыйыншлыды. Аллай адамларыбызны бириди Батчаланы Хаджи-Исхакъны къызы Залина да, аны бла окъуучуларыбызны шагъырей этерге излейме.
Залинаны сабий джыллары джуртубузну эм ариу джерлерини биринде, туугъан эли Огъары Тебердиде, ётгендиле. Ол джети джылында Черкесскеге къарт анасына джашаргъа кёчеди. Биринчи классха да Черкесск шахарда 9-чу номерли гимназиягъа баргъанды. Школну айырмагъа, алтын медаль бла, бошагъанды. Залина къарт анасыны да, устазланы да юретгенлерин дженгил алгъанлай баргъанды. Кёбню кёрген, джашау сынамы уллу аннясы аны намысха, адебге юретгенлей тургъанды. Аны бла да къалмай, Залина кеси да уллу юйюрден чыкъгъан сабийди. Атасы бла анасы беш сабийни бирин да эрке этмей, окъуудан, джумушдан башха алагъа бош заман табылмазча, алай къаты ёсдюргендиле. Сабийлери барысы да школда айырмагъа окъугъандыла. Аны себебли, сабийлигинде огъуна Залинаны джитилиги, билим алыргъа талпымакълыгъы окъутхан устазларын да сейирсиндирир ючюн къоймагъанды.
Фахмулу къызчыкъ школла арасы олимпиадалада огъай эсенг, республикан дараджада бардырылгъан конкурслагъа, эришиулеге да тири къошулуб, кеси да биринчи болуб, окъугъан школун да алчы школланы тизимине чыгъаргъанлай тургъанды. Залинаны аллай мийик дараджалагъа чыкъгъан джетишимлерини бири «Умники и умницы» деген телевизион олимпиадада финалгъа чыкъгъанын айтыргъа боллукъду. Акъылтокъмакъланы бири деб аны бла барыбыз да махтанырчабыз. Школну алтын медалгъа тауусхан таулу къызчыкъ, билимин ёсдюрюр мурат бла Къарачай шахарда КъЧКъУ-гъа окъургъа кириб, аны да айырмагъа тауусханды.
Алайды да, бу джарыкъ, джити, билимли таулу къызчыкъ билгеним боллукъду деб тохтаб къалмай, билимин ёсдюргенлей барады. Бюгюнлюкде ол илму-тинтиу ишле бла да кюрешеди. Аны ондан аслам илму иши илму журналлада басмаланнганды. Илмуну кенг джолунда кесин таныта баргъанын университетни илму къуллукъчулары да айырыб чертгенлей, аны саулай университетде студентледен сора да, джаш устазлагъа юлгю этгенлей турадыла. Кеси да студентлени арасында бардырылгъан уллу илму квестде -эришиуледе – берилген бир сорууну да джууабсыз къоймай, барына да тюз джууаб бериб, кишини алгъа иймей хорлагъанды.
Джаш болса да, болумлу, кимге да болушургъа хазыр тургъан Залинаны адамлыкъ шартларын айтмай къояргъа джарамаз. Ол орус тилгеча, кесини ана тилине, ингилиз тилге да тамам устады. Университетде дипломун алгъандан сора, Залинаны анда огъуна окъуугъа кирирге хазырлау джаны бла бёлюмюне ишге аладыла. Бир кесекден ол кеси окъугъан школда ингилиз тилден устаз болуб да ишлегенди. Ма аллай, керти устаз шартлары болгъан, халал джюрекли адам болгъанын аны таныгъанла бары да айтырыкъдыла.
Бусагъатда Залина Къарачай шахарда Алийланы Умар атлы университетде устазланы санагъат джаны бла усталыкъларын ёсдюрген эмда бирси усталыкълагъа юретген факультетни къуллукъчусуду.
Джаш тёлюбюзде быллай тири, болумлу, билимли къызларыбызны, джашларыбызны чемерликлерине, фахмуларына тыйыншлы сый берирге, махтаугъа тыйыншлы болгъанланы да атларын кенг белгили этерге керекбиз. Ала барысы да бизни тамблагъы насыбыбыздыла, къралыбызны ышаннгылы тёлюсюдюле.
