Сабийни атасы бла анасы гитче заманчыгъындан башлаб, игини-аманны айырыргъа юретиб башлайдыла. «Тама-тама кёл болур» дегенлей тюз иннетни джолунда аланы юретгенлери, къыйынлары бошуна болмайды, айхай да, аллай сабийле абадан болургъа кеслерини фахмуларын, чемерликлерин танытмай къоймайдыла.

Аллай сабийни, гитче класслада окъугъан джылларында огъуна, устазы эслеб, сабийни ол джаны бла айнытыр, ёсдюрюр джаны бла кюреше барса, миллетине, къралына да хайырлы адам болмай къалмаз.
Алайды да, аллай фахмулу сабий болуб ёсгенди Къаракетланы Мухаммат-Алийни къызы Тамара да. Ол У.Хабеков атлы гитче классланы устазларын хазырлагъан училищеге кириб, аны джетишимли тауусхандан сора, билимин андан ары ёсдюрюрге къаст этиб, туризм джаны бла да окъуб усталыкъ алады. Алай болса да, бир затха фахмусу болгъан адам къуру бир хатда тохтаб къалалмайды, ол дагъыда джангы усталыкъла алыргъа талпыйды. Тамара да туризм джаны бла усталыкъ алгъаны бла тохтатмайды билимин ёсдюргенин. Ол джашауну бюгюннгю излемлерине кёре къуралгъан джангы технологиялада уста болгъанын «Кванториум 09» деген мобиль технопарк бла «ЦДОД» деген къошакъ окъуу аралыкъда танытханды. Ол бюгюнлюкде гео-аэроинформациялы технологиялагъа, алай дегеним дронланы чачаргъа, технологиясын билирге юретгенден сора да, видеосъемкаланы тюз бардырырча мадарларын да сабийлеге юретеди. Бюгюнлюкде Интернет мадарла кёб тюрлю болгъан дунияда джашагъаныбыз себебли, аллай лагъымланы да толу билирге амалсыз керек болады джаш тёлюге. Алайды да, Тамара кеси да джаш адам бола тургъанлай, юренирге, юретирге талпыб тургъан билими кёрюнюб турады. Аны бла да къалмай, Тамараны юсюнде айырыб чертерге тыйыншлы энчи затыны юсюнден да айтырчады. Ол туугъан джуртуна сюймеклиги аны къуру бу санагъатны сайлагъанында болуб къалмагъанды, ол хакъ кёлю бла ана тилни айнытыуда, аны терен билиуде да уллу иш бардыргъанлай турады. Башында сагъынылгъан компьютер технологиялы аралыкъда устазлыкъ джумушну айыбсыз толтура, Тамара бюгюнлюкде Къарачай шахарда Алийланы Умар атлы Къарачай-Черкес кърал университетни филология факультетинде да айырмагъа окъуйду. Ол ана тил бла адабиятха аталгъан конкурслагъа, фестиваллагъа къошулгъанлай, кеси да биринчилени тизиминде болгъанлай турады. Университетде аны окъутхан устазлары да бир аууздан аны болумлулугъуна сый, махтау бериб сёлешедиле. Айхай да, ана тилни аныча уста билген, фахмулу студентле аздыла. Ол университетде болсун, бирси республикан дараджада бардырылгъан ана тиллеге аталгъан джыйылыулада болсун, мероприятиелени программасын ана тилинде уста бардыргъанлай турады.
Алайды да, бусагъатда Къаракетлены Тамара быйыл джангы ачылгъан «Сары киштик» деген сабий журналны джарашдырыучу корректорду. Ол сабийлеге теджелген джазма ишлени - сабий оюнланы, айтыуланы, джомакъланы, джырланы, таурухланы - грамматика джанына да эс бёле, журналгъа уста джарашдырады. Тамараны фахмусуна, болумуна ким да сый, махтау берирчады.
Бизни джаш тёлюбюзде быллай джаш адамланы атлары миллетибизде огъай эсенг, джуртубуздан тышына да белгили болургъа тыйыншлыдыла.