Алтотур айны 12-де Къарачай-Черкес Республиканы Башчысы Темрезланы Рашид Росреестрни Къарачай-Черкесияда управлениесини тамадасы Батчаланы Аминат бла тюбешгенди. 

Тюбешиуню кёзюуюнде ведомствону озгъан джылгъа бардыргъан ишлерини эсеблерин сюзгендиле, юйню-мюлкню эмда джерлени эсебге тюшюрюу джаны бла быйылгъа салыннган планланы юслеринден сёлешгендиле. Батчаланы Аминат билдиргенден, управление кърал властны органлары бла да, арада иш джюрютюлген структурала бла да, муниципалитетле бла да къысха байламлылыкъда ишлейди.
Кърал джумушланы цифрагъа айландырыу бла аланы электрон халда баджарыу быйыл да баш борчланы биридиле. 2023-чю джылны эсеблерине кёре, ол джаны бла республика иги ёсюм алгъанды. Сёзсюз да, ол затда управление бла МФЦ биригиб ишлегенлерини уллу хайыры болгъанды.
Темрезланы Рашид Эресей Федерацияны Президентини «Национальная система пространственных данных» деген кърал программаны джашаугъа кийириуню хакъындан кесаматлары тыйыншлысыча толтурулгъанларын да чертгенди. Бюгюнлюкде баш борчланы бири – республиканы бютеу эллерин Бирикген электрон картография бла баджарыуду.
Къарачай-Черкесияны джеринде тыйыншлысыча хайырландырылмагъан джерлени ачыкълау эмда алайлада мекям ишленирча этер джанындан ишле да бардырылгъанлай турадыла.
Темрезланы Рашид бла Батчаланы Аминат чертгенден, регионда хайырланыугъа берилген мекямланы саны джылдан джылгъа ёсюб барады. Къуру озгъан джыл ол 20 процентге аслам болгъанды.