Алтотур айны 7-де Къарачай-Черкесияны ара шахарында республикан больницаны джеринде уллу къууанч джыйылыу болду - аны арбазында гитче клиса бла межгит ачдыла.
Энди больницаны тийресинде болгъан адамгъа кесини джюреги излегенча къуллукъ этерлай хыйсаб къуралды. Ауругъан ахлусун кёре келген адам алайгъа къайтыб, къуллукъ, тилекле этерге боллукъду. Неда дохтурланы этген дарманларындан сора да, ауругъан адам джаны къыйналгъанын, джарсыуун да клисада дин къуллукъчугъа айтыб, джюрегине бир себеблик табарыкъды.
Джыйылыугъа КъЧР-ни Халкъ Джыйылыууну (Парламентини) Председатели Александр Иванов, РФ-ны Кърал Думасыны депутаты Ёзденланы Солтан, КъЧР-ни Правительствосуну Председатели Мурат Аргунов, Шимал Кавказны Муслиманларын бирикдирген аралыкъны председатели эмда КъЧР-ни муфтийи Бердиланы Исмаил хаджи, орус православ клисаны тамада дин къуллукъчусу, Черкесскеде эмда Пятигорск шахарлада клисаланы архиепископу Феофилакт, КъЧР-ни Халкъ Джыйылыууну (Парламентини) депутатлары, джамагъат эмда дин организацияланы тамадалары, республикада районланы эмда шахарланы администрацияларыны башчылары, Абу Ханифа имамны атын джюрютген Къарачай-Черкес ислам институтну студентлери, журналистле, шахарчыла эмда къонакъла келген эдиле.
КъЧР-ни Халкъ Джыйылыууну (Парламентини) Председатели Александр Иванов джыйылгъан миллетни аллында Къарачай-Черкесияны Башчысы Темрезланы Рашидни атындан сёлешди. Ол бу иш республикабызда джашагъанланы бирикдириуню эмда тин-дин байлыкъларыны белгиси болгъанын чертиб айтды.
- Къралыбызны халкъларыны келечилери, къайсы динде болгъанларына къарамай, хар заманда да байрамланы эмда эсгериу кюнлени бирге белгилейдиле. Къыйын кёзюуде ала бир-бирин джокълагъанлай, бир-бирине болушханлай келедиле. Аланы барысын да бирикдирген джангыз Ата джуртубузду эмда аланы бирча тюз иннетлери болгъан тин байлыкъларыды. Керек болса, джетген кюнде, Эресейни гражданлары къралны джакъларгъа бирден ёрге турадыла. Къачан да алай болуб тургъанды, болуб турлукъду, - деди Александр Иванов.
Сёз КъЧР-ни муфтийи Берди улу Исмаил хаджиге берилди. Къралыбызда мамырлыкъ, тынчлыкъ сакъланыб тургъаны Эресейни Президенти Владимир Путинни акъылман шартларыны бири болгъанын чертиб айтды ол. Бизни регионда кёб джылланы узагъына динлени эмда миллетлени келечилерини араларында шохлукъ, джууашлыкъ сакъланыб тургъаны Къарачай-Черкесияны Башчысы Темрезланы Рашидни кючюнден болгъанын да билдирди Исмаил хаджи.
- Межгитни, клисаны ишлерге деген нюзюр да Башчыбыз Темрез улуну къурамчылыгъы бла башланнганды. Аны толу джашаугъа сингдирирге, хайырландырыргъа Черкесск шахарда Багъыу-реабилитацион аралыкъны баш врачы Темрезланы Солтан-Хамидни джашы Бориспий бу магъаналы ишге уллу къыйынын къошханы ючюн «За заслуги перед Уммой» деген I-чи дараджалы орденнге тыйыншлы болгъанды. Аны саугъа этерге излейбиз, - деб муфтий Берди улу Темрезланы Бориспийге орденни берди. Межгит бла клисаны къурулуш ишлерине юлюш къошханланы да – Сергей Смородин бла Батрукъланы Казим хаджини - «За заслуги перед Уммой» деген II-чи дараджалы орден бла саугъалады.
Черкесскени эмда Пятигорскени архиепископу Феофилакт Темрез улу Бориспий бла Сергей Смородиннге Махтау къагъытла берди. КъЧР-ни Правительствосуну Председатели Мурат Аргунов алайгъа келген джамагъатны бу уллу къууанч бла алгъышлаб, келгенлеге джюрек разылыгъын да билдирди.
- Былайгъа къуру саны ауругъанладан сора да, джаны джарсыгъан, кёлю азайыб, джашаудан тюнгюлгенле да келедиле. Аны себебли, мен ангылагъандан, алагъа бу клиса, межгит да бек уллу себеблик этерикдиле. Аны бла да къалмай, къыйын ауругъан адамына келген былайда кеси Бир Аллахха табыныб, андан саулукъ, себеблик тилерге, къуллукъ этерге да боллукъду, - деди Феофилакт.
- Бу арт джыллада республикабыз, къралыбыз бла бирге, кёб тюрлю сынауладан ётгенди - пандемияны кёзюуюнде болсун, тыш къралланы бизни къралгъа салгъан санкцияларыны зараны болсун, бусагъатда СВО-ну заманы болсун. Къыйынлыкъ джууукъ болуб, не бек кючлю къысса да, аллай бир биз бир-бирибизге дагъан болургъа кюрешгенбиз. Аллай бир бир-бирибизге джууукъ этгенди бизни сынау. Ол затланы кертилигин кесибиз кёзюбюз бла ачыкъ кёребиз, СВО башланнганлы бери да толу ангылагъанбыз аны - бирикмекликни кючюн не уллу джау да хорлаялмазлыгъын, - деди Мурат Аргунов.
Былайда эсигизге салыргъа излейбиз, Къарачай-Черкес республикан больница 1922-чи джыл къуралгъанды. Анда медицина къуллукъчула адамланы амбулатория, поликлиника джумушла бла кече-кюн да тыйыншлысыча баджаргъанлай турадыла. Бир джылны ичинде 13 мингден аслам ауругъан адам кесини саулугъун бакъдырады. Республиканы районлары бла шахарларындан келиб ишлегенлени саны 1 мингнге джетеди.
БАТЧАЛАНЫ Фатима.
