Черкесск шахарны Шимал микрорайонунда джангы физкультура-саулукъ сакълау комплекс ишлер мурат барды. Ол республикада эм уллуланы бири боллукъду. Аны къурулушу быйыл башланныкъды эмда аны уллулугъу 6000 квадрат метр боллукъду.

Аны юсюнден Къарачай-Черкес Республиканы Башчысы Темрезланы Рашид кесини Телеграм-каналында джазгъанды.
- Кърал бла энчи механизмни биригиб ишлегени бла джаратыллыкъды бу уллу комплекс. Инфраструктураны ёсюмюне бу тукъум шохлукъну файдасы боллугъуна бир тукъум бир ишек джокъду.
Бу спорт комплексни ишлеуню оноуу халкъла арасы «Эресей» кёрмючню-форумну кёзюуюнде этилгенди. КъЧР-ни Физкультура бла спорт министерствосу эмда «Управление спортивными проектами» компания комплексни ишлери бла байламлы кесаматха къол салгъандыла. Ол тюбешиуню кёзюуюнде Эресейни спорт министри Олег Матыцин да алайда болгъанды.
Спорт комплекс юч студиядан къураллыкъды: адамла къауум-къауум болуб спорт бла кюреширикдиле, сабий студия ишлерикди эмда бассейнле боллукъдула. Былайда адамла джерден чыкъгъан исси суу бла да хайырланныкъдыла.
Бери уллу, гитче да джол табарыкъды, спортну къайсы тюрлюсю бла да кюреширге боллукъду. Эм игиси уа неди десенг, бу комплексде кемизли адамла да спорт бла кюреширге мадар табарыкъдыла.
Спорт комплексге адамла сабийлери бла джол саллыкъларына ажымсызма. Бу спорт мекям хайырланыугъа теджелсе, 80 иш орун ачыллыкъды, - деб чертгенди Темрезланы Рашид.