Байрым айны ахыр кюнлеринде республиканы школларында патриотлукъ, къоруулау-кёбчюлюк, спорт ишлеге аталгъан айны тамамладыла.

Ол айлыкъ башил айны 21-де, Бютеуэресей школ программаны тамалында къуралыб, бютеу школлагъа баямланнган эди. Сохтала айны ичинде республиканы бирси школларындача, спортну талай тюрлюсюнден, школ программагъа кирген, аскерчиликге аталгъан дерследе дагъыда башха талай тюрлю болумда кеслерини билимлерин, фахмуларын сынаб эришгендиле. Эришиуле тюрлю-тюрлю дараджада бардырылгъандыла.
Джёгетей Аягъы районну Важное элини школунда да абадан классланы сохталары бир айны ичинде билимлерин, фахмуларын кёргюзгендиле. Ала Ата джуртну сюерге, аскерчиликге юретиуге аталгъан тюрлю-тюрлю мероприятиеле, спорт эришиуле бардыргъандыла. «Согреем друг другу сердца», «Есть такая профессия – Родину защищать!», «Родной язык, ты так прекрасен» дагъыда талай темагъа иш бардыргъандыла. Ол ишни юсюнде башха устазла бла бирге къарачай тил бла адабиятдан устаз Темрезланы Алина да керти хакъ кёлю бла, солуу кюн деб къарамай, сабийлени хазырлаб кюрешгенди. Украинада СВО-да къуллукъ этген джердешлерибизни кёллерин кёлтюрюр нюзюр бла, Ата джуртну къоруулаучуну кюнюне атаб, тюрлю-тюрлю саугъала да хазырлагъандыла. Сохтала Уллу Ата джурт къазауатны тылда ветеранларын джокълаб, кеслерине да саугъала этиб, кёллерин кёлтюрюб, къууандыргъандыла.
Айтыргъа, башха джылладан эсе быйыл школлада кёбчюлюк патриотлукъгъа аталгъан юретиу ишле кенг, джарыкъ бардырылгъандыла. Быллай джумушла сохталагъа не джаны бла да аланы билимлерин ёсдюрюуге уллу себеблик бергени хакъды. Къуру дерследе окъугъандан сора да, алгъан билимлерин иги бегитирге дагъыда бирси школладан келген сохтала бла байламлылыкъ джюрютюрге, бир-бирине болушлукъ этерге тамал салады. Аны бла да къалмай, шохлукъну къаты тутаргъа эмда Ата джуртну сюерге учундурады, кесича бир тюрлю сезим бла ангыларына сингдиреди.

БАТЧАЛАНЫ Фатима.