Къарачай-Черкесия «Жильё и городская среда» миллет проектни «Формирование комфортной городской среды» деген федерал проектин джашаугъа сингдириуге уллу эс бёледи.

Владимир Путин Федерал Джыйылыугъа этген Чакъырыуунда шахарланы джарашдырыу бла кючлю кюрешген регионлагъа болушлукъ табдырыргъа тыйыншлысын чертгенди. Аны бла байламлы къошакъ халда 360 миллиард сом бёлюннюгюн да билдиргенди.
Шахарланы таб джарашдырыу бла байламлы конкурсну мындан ары да бардырыргъа кереклисин да айтханды Владимир Путин.
- Алты джылны ичине 30 мингден аслам джер ариу джарашдырыллыкъды. Тарих аралыкъланы, суу боюнланы, паркланы джарашдырыугъа уллу эс бёлген регионлагъа къошакъ халда ачха берилликди. Айтыргъа, ол джумушлагъа джораланыб 360 миллиард сом джиберилликди, - деб чертгенди Эресейни Президенти кесини Чакъырыуунда.
Бу конкурс 2018-чи джылдан бери бардырылады. Кеси да «Жильё и городская среда» миллет проектни «Формирование комфортной городской среды» деген федерал проектине киреди.
Къарачай-Черкесия бу конкурсха тири къошулгъан субъектлени бириди. Конкурсда юч кере алчы оруннга ие болгъаны да ол затны толу бегитеди.
Айтыргъа, КъЧР конкурсда хорлагъаны ючюн, Къарачай шахарда «Джашил айрымканны», Джёгетей Аягъында Ара паркны джарашдырыргъа мадар табханды, – деб билдиргендиле КъЧР-ни Къурулуш бла фатар-коммунал мюлк министерствосунда.
Черкесскеде «Джашил айрымкан» маданият бла солуу парк да бюгюнлюкде ол конкурсну юсю бла джарашдырыла турады.
2017-чи джылдан бери Къарачай-Черкесияда 447 кёб фатарлы арбаз бла 142 джамагъат аслам барыучу джер джарашдырылгъанды.