2024-чю джыл оюлургъа боллукъ юйледен 170 адамны кёчюрюрге умут этедиле. Ол юйлени барысыны да уллулугъу 2780 квадрат метр болады.

Владимир Путин Федерал Джыйылыугъа этген Чакъырыуунда оюлургъа боллукъ мекямладан адамланы кёчюрюу бла байламлы Эресейни Правительствосуна джангы программа джарашдырыргъа борч салгъанды.
Бу тукъум программагъа Къарачай-Черкес Республика 2011-чи джыл киргенди.
- 2011-чи джылдан 2023-чю джылгъа дери КъЧР-де оюлургъа боллукъ юйледен 2349 адам кёчюрюлгенди. Айтыргъа, ол юйлени барысыны да уллулугъу 28666,69 квадрат метр болгъанды.
2023-чю джыл программаны биринчи этапында 2017-чи джылдан 2022-чи джылгъа дери Къарачай-Черкесияда джараусуз юйледен 298 адам кёчюрюлгенди, бютеулей да ала джашагъан юйлени уллулугъу 4481,2 квадрат метр болгъанды, - деб билдиргендиле республиканы Къурулуш бла фатар-коммунал мюлк министерствосунда.
Программаны 2-чи этапында 2024-чю джыл джараусуз мекямладан 170 адамны кёчюрюр иннет барды, бютеулей да ала джашагъан юйлени уллулугъу 2780 квадрат метр боллукъду.
Алгъаракъда билдиргенлерине кёре, 2023-чю джыл Къарачай-Черкесияда 2022-чи джылгъа кёре 35,9 процентге аслам фатар юй хайырланыугъа берилгенди – ол 420 минг квадрат метрге джетгенди.