КъЧР-ни Башчысы 2023-чю джылны Промышленностну ёсюмюню джылы деб баямлагъан эди.

Озгъан джыл алты джангы промышленность производство ишлеб башлагъанды. Ала къурулуш материалла, эл мюлк продукцияны джарашдырыу, текстиль производство эмда гидроэнергетика бла байламлы болгъандыла.
Аланы юсю бла 500 адам иш къоллу болгъанды. Аны бла бирге Эресейде тыш къралладан келген товарланы орунларын алыргъа бизни республикада чыгъарылгъан продукция да кесини тыйыншлы юлюшюн къошханды. Къысхасы, тыш къралладан келген товарла, ала кесибизде чыгъарылгъанлары себебли, азыракъ болгъандыла. Аны хакъындан КъЧР-ни Башчысы Темрезланы Рашид кесини Телеграм-каналында джазгъанды. Аны кибик ол чертгенден, 2023-чю джыл промышленность производствону индекси 2022-чи джылгъа кёре 12 процентге ёсгенди.
- Арт юч джылда бу кёргюзюм ёсюб барады. Бизни миллет Башчыбыз Владимир Путин кесини Чакъырыуунда промышленность индустрия бла байламлы кърал политикасын кескин белгилегенди – компанияла ишлерин игилендирирге керекдиле эмда алагъа не джаны бла да болушлукъ табдырыргъа тыйыншлыды. Къарачай-Черкесия ол джолдан таярыкъ тюлдю.
Сёз ючюн, биз халы этген производствону башларгъа умут этебиз. Ол 600 адамны иш бла баджарлыкъды. Бир джолгъа 1,5 минг тонна халы чыгъарлыкъды. Бу проектни биринчи этапы 2024-чю джыл джашаугъа сингдирилликди – джюнню джарашдыргъан, джуугъан оборудование ишлеб тебрерикди, - деб джазгъанды Темрез улу.