Сыйлы джамагъат, белгилисича, бусагъатда къралыбыз кесини эркинлигин джакълай, къара кюч бла кюрешни бардырады.
АБШ бла Кюнбатышны къраллары, бир иннетли болуб, Эресейни чегине джууукълашыргъа излегенден, къралыбызны джерине джутланнгандан, Украинаны миллети къырылгъанын да сан этмейдиле.
Умутлары алай болгъанды – Эресейни ичинде кёб тюрлю миллет джашагъаны себебли, бир-бирине ёчюгюрюкдюле, бирикмеклик боллукъ тюлдю, къралны ичинден ояргъа хыйсаб барды деб.
Кертисинде уа, Уллу Ата джурт къазауатны заманында кибик, къралыбызны бютеу миллетлери Ата джуртха сюймекликни, бирикмекликни юлгюсюн кёргюзедиле. Ол кёзюуледе да къарачай миллетни уланлары айырылыб ётгюрлюкню танытхан эдиле. Бусагъатда да, джау юйлерине, юйдегилерине джууукъ келмесин деб, кеслери разылыкълары бла аскер къуллукъгъа барадыла – Украина бла къаугъагъа таукел къошуладыла. Джанларын-къанларын да аямай, джуртну джаудан джакълайдыла. Ол джашларыбызны атлары тарихде алтын харифле бла джазыллыкъдыла.
Къарачай миллетни джигит джашы, Эресейни белгили аскерчиси, лётчик генерал-майор Боташланы Хусейни джашы Къанамат миллетибизге юлгюдю. Айхай да, джаны джашаса сюе эдик, кетер болгъандан сора да, миллетибизни атын айтдырыб кетди. Барыбыз да ёхтемленебиз таулу джаш бла, бютеу къралыбыз да ёхтемленеди.
Сёзсюз да, Къанаматча джигит джашларыбыз энтда чыгъарыкъдыла, Джуртха сюймекликни танытырыкъдыла, танытхан да этедиле. Джангыз Аллахдан тилерибиз – юйлерине, юйдегилерине сау-саламат къайтсынла.
Бусагъатда джашла кесамат бла къазауат этедиле. Джыллары онсегизге толуб, амалсыз аскер къуллукъгъа баргъан джашчыкъла къошулмайдыла.
Энтда кеслери разылыкълары бла барыргъа излегенлеге барды эркинлик. Хайт дегиз, джашла. Джуртха къоркъуу болгъан сагъатда къадама болуб сюелиучю миллетни уланлары, Ата джуртубузну да сакълай, кесигизни джаныгъызны да сакълай, джауну хорларыгъызгъа ышанабыз.
Биз мындан ары да гуманитар джюкле ашыргъанлай, къолдан келген болушлукъну этгенлей турлукъбуз.
Джуртну джакълагъан джашларыбызгъа, энди барлыкълагъа да разылыгъыбызны билдиребиз. Юйюгюзге-юйдегигизге хорлам бла, сау-саламат къайтыгъыз деб тилейбиз.
Хабланы Руслан,
«Къарачай – алан халкъ» джамагъат бирлешликни председатели.
