Бу кюнледе КъЧР-ни Башчысы Темрезланы Рашид «ЧГПАТП-1» предприятиени тамадасына 19 джангы автобусну ачхычларын бергенди.

Аланы араларында 15 «Ситимакс 9» эмда 4 «Вектор NEXT» автобусла бардыла. Кеслери да заманны излемлерине толу келишедиле, адамланы къоркъуусуз джюрютюрча этилгендиле.
Джангы автобусланы ачхычларын бериуге аталгъан къууанч джыйылыугъа Черкесск шахарны мэри Алексей Баскаев, «ЧГПАТП-1» предприятиени тамадасы Сергей Скрипка, автобусланы джюрютюрюкле къошулгъандыла.
«Ситимакс 9» автобусха, сюелиб барыргъа боллукъ орунланы да санаб, 77 адам сыйынады. Аны адамла миниучю-тюшюучю джерлени билдирген кереги барды. Кенг эшиклери, адамланы эркин, тыйыншлысыча миндирирге, тюшюрюрге, къоркъуусуз джюрютюрге мадар бередиле. Автобусну хазырлагъан заманда гитче сабийлери болгъанланы, сакъатланы да эсге алгъандыла – алагъа да таблыкъла къуралгъандыла.
«Вектор NEXT» автобусха 68 адам сыйынады. Ол да не джаны бла да таб джарашдырылгъанды.
Республиканы Башчысы джангы автобуслагъа къараб чыкъгъанды, аланы бирин кеси джюртюб да кёргенди.
Темрезланы Рашид Эресейни Президентине, регионну джамагъатын джюрютюрюк улоуну джангыртыугъа болушханы ючюн, разылыгъын билдиргенди. РФ-ны Правительствосуну Председателини орунбасары Марат Хуснуллиннге да, бу ишде кёлтюргючлюк этгени ючюн, бюсюреу этгенди.
«Адамланы къоркъуусузлукълары неден да багъалыды. Арт эки джылны ичине Черкесскеде 26 джангы автобус джюрюб башлагъанды», - дегенди Темрезланы Рашид.