Бу кюнледе Къарачай-Черкес Республиканы аскер комиссары Белобородов Сергей Станиславович республиканы кърал газетлерини, телевидениесини къуллукъчуларын джыйыб, джазгъы аскер чакъырыуну юсюнден, аланы сорууларына джууаб бере, хапар айтды.
- Сергей Станиславович, озгъан джыл къачхы аскерге чакъырыу къалай ётдю?
- Озгъан джыл къачда аскерге чакъырыу, белгиленнген мардада тыйыншлысыча ётгенди. Джаш адамла кеслерини граждан борчларын толтура, аскерге барыргъа излейдиле. Аскер комиссариатланы къуллукъчулары Эресей Федерацияны субъектлерини толтуруучу органлары бла биригиб, алагъа салыннган джууаблы борчну сый бла толтургъан эдиле. Планда белгиленнгенича, 400 джаш адам аскерге чакъырылгъанды. Алагъа аякъ, юс, баш кийим дагъыда башха керекли затла берилиб, ашарыкълары джарашыб, барлыкъ джерлерине ашырылгъандыла. Самолёт 8 рейс этгенди. Ала Камчатка край, Сахалин область дегенча, къралыбызны узакъ джерлеринде къуллукъ этерикдиле. 300 джаш адам аскер частына поездле бла, автобусла бла баргъанды. Ол иш бизни республиканы муниципал районларында тыйыншлы дараджада бардырылгъанды.
- Быйыл джазда аскерге чакъырыу къачан башланныкъды? Аскерге чакъырылгъанла спецоперациягъа къошуламыдыла?
- Бу соруугъа джууаб бере, чертиб айтыргъа излейме, озгъан джыл къачда аскерге чакъырыу бла бусагъатда бардырыллыкъ чакъырыу спецоперация бла байламлы тюлдюле.
Озгъан джылдача, быйыл да аскерге чакъырыу Эресей Федерацияны законунда белгиленнгенича, арттотур айны 1-ден, элия айны 15-не дери бардырыллыкъды. Аскер къуллукъну заманы тюрленмейди, тургъаныча къаллыкъды. Ол бусагъатха дерича, бир джылды. Аскерге чакъырылгъанла спецоперациягъа къошуллукъ тюлдюле. Джаш адамланы аскерге Эресей Федерацияны субъектлерини джыйым пунктларындан бу айны 15-де ашырыб башларыкъбыз. Аскер къуллукъларын толтургъанла юйлерине къайтырыкъдыла.
- Джаш адамланы аскерге чакъырылыуларыны джыллары тюрленнгенди, деген хапарла джюрюйдюле. Ол кертимиди?
- Хо, кертиди. 2024-чю джылны башил айыны 1-ден тюрлениуле болгъандыла. Энди аскерге 30 джылгъа дериле да чакъырыллыкъдыла. Тюрлю-тюрлю баш окъуу заведениеледе окъугъан джаш адамланы аскер комиссариат аскер тергеуден чыгъарыб тургъанды. Энди аланы джыллары 27-ден атласа да, ала аскер къуллукъларын этерге керекдиле. Алай этилгени аскер бёлекледе къуллукъ этгенлеге да игиди. Алагъа иги билимлери, джашау сынамлары болгъанла барлыкъдыла. Алай бла, быйылдан башлаб, 27-30 джыл болгъанла да, Ата джуртларын сакълай, джууаблы борчларын толтурлукъдула.
- Кёб турмай къралыбызны джер-джеринден кёб джаш адам аскерге барлыкъды. Ала аскер къуллукъларына къалай хазырланыргъа керекдиле?
- Эм биринчи, Эресей Федерацияны законуна кёре, аскер комиссариатла белгилеген заманда барыргъа керекдиле. Ол пунктлада аскерге чакъырылгъан джашланы саулукъларын медицина джаны бла толу тинтер мадарла къураллыкъдыла. Кеслери ушатхан аскер бёлекледе къуллукъ этерге излегенле уа заманны созмазгъа керекдиле. Хар тюрлю аскер бёлекни кесини энчи излеми барды.
- Къоруулау министерство илму бёлюмле къураргъа терен эс бёледи. Фахмулу джашла аллай бёлекде къуллукъ этерге излейдиле. Аны юсюнден сиз не айтыргъа боллукъсуз? Андан сора, аскерге чакъырыуну юсюнден толу хапарны къайдан билирге боллукъду?
- Бусагъатда 17 илму рота барды. Аланы сегизи «Эра» деген технополисдеди. Гуманитар илму взвод да бир барды. Озгъан джыл Къарачай-Черкес Республикадан 2 адам илму ротагъа ашырылгъанды. Сайлау иш баш окъуу заведениеде, комиссариатда бардырылады. Сёз ючюн, илму ротаны оператору болур ючюн, адамны ол джаны бла баш окъуу билими болургъа керекди. Илму ротагъа тюшгенле, къралны къоруулагъан джаны бла илму-тинтиу ишлеге къошулургъа боладыла. Ала белгили алимле, конструкторла, инженерле, устала, экспертле бла ишлерикдиле.
Аскерге чакъырыуну юсюнден толу хапар Эресей Федерацияны Къоруулау министерствосуну официал сайтында «Призывник», «Памятка призывнику», «От призывника до солдата», «Научные роты» деген бёлюмлеринде барды.
Лепшокъланы Хусеин.
