Бу кюнледе КъЧР-ни Башчысы Темрезланы Рашид газ бла баджарыуну хакъындан федерал штабны кенгешине видеоконференция халда къошулгъанды.

Кенгеш РФ-ны Правительствосуну Председателини орунбасары Александр Новакны башчылыгъы бла ётгенди.
Кенгешде айтылгъаннга кёре, Къарачай-Черкесияда «Социальная догазификация» деген программаны тамалында адамла 5206 тилек къагъыт бергендиле. Аладан 4814 тилекге къаралгъанды, газ бла баджарыуну юсюнден 4715 кесамат этилгенди, 4661 кесаматны юсю бла къурулуш-монтаж ишле тамамланнгандыла.
2024-чю джыл тюшген тилек къагъытла бла кесаматлагъа кёре 1132 юйге газ тартырча быргъыла салыныргъа керекдиле. Аны бла байламлы ишле тыйыншлысыча этиле барадыла. Бир къауум адамлагъа, аскер къаугъагъа къошулгъанла бла аланы юйдегилери да аланы араларында болуб, болушлукъ этер мурат бла газ оборудование алыргъа неда кеслерини джерлерине газ быргъыла ишлетиуге джойгъан ачхаларын субсидия халда ызларына къайтарыр ючюн республикан бюджетде ачха бёлюннгенди.
Аны бла да къалмай, социал магъаналы объектлени газ бла баджарыуну юсюнден 17 тилек къагъыт джиберилгенди.
«Социальная догазификация» деген программаны тамалында этилген ишлени эсеблерине кёре бюгюнлюкде Къарачай-Черкесия табигъат газ бла 84,33 процентге баджарылыбды.