Къарачай-Черкесияны сютден этилген продукциясын Эресейни джер-джеринде бек сюйюб аладыла.

2024-чю джыл ай бла джарымны ичинде хоншу регионлагъа Кавказдан 119 тонна кирсиз эмда таза сют продукция джиберилгенди. Озгъан джыл бизни республикада 130 минг тонна сют сауулгъанды.
Алайды да, Къарачай-Черкесияны юч уллу тууар эмда ондан аслам фермер мюлкю иги аякъ тирегенлери бла бюгюнлюкде хоншу регионлагъа сютден этилген затланы эм кёб табдыргъанла болуб къалмай, хоншу къралланы - Азербайджан бла Абхазияны - да излемлерин толу баджарадыла.
- Малчылыкъ бизни эл мюлкюбюзню атын айтдырыб тургъан санагъатланы бириди. Кърал, регионла, табышлылыкъ иш бла кюрешгенле эмда эл мюлкге берилген адамла бюгюнлюкде бир-бирлери бла къысха байламлыдыла. Быллай бирикмеклик аллыбызда тургъан борчланы бет джарыкълы тындырыргъа мадар берлигине ажымсызма, - дегенди Къарачай-Черкес Республиканы Башчысы Темрезланы Рашид.
2023-чю джыл бизни республика тышына ашыргъан сют продукцияны саны буруннгу джылдан кёб болгъанды. Регионну сютден этилген затларына тышындан излем ёсгенден ёсе барады. Айтыргъа, былтыр 1976 тонна сют продукция ашырылгъанды КъЧР-ден хоншу субъектле бла тыш къраллагъа. Анга кёре, бизде да сютден этилген затланы чыгъарыугъа уллу эс бёлюнеди. 2023-чю джыл 2022-чи джылдан эсе 5,38 процентге аслам сют продукция ашырылгъанды тышына.