Маданият бла санатланы А. Дауров атлы колледжини ДПИ бёлюмюню студентлери диплом ишлерин джакълагъанларын, ала агъачха оюу салыб этген (резьба по дереву) затланы кёргенле сейир-тамаша болгъандыла. Ол ишле фахмулу устаз, агъач уста Сергей Бабенкону башчылыгъы бла этилгендиле.

Къыйын оюула салыннган омакъ кюбюрчекчиклеге, вазалагъа, аны кибик агъачдан этилген башха затлагъа къарасанг, аланы этген джаш адамланы фахмуларына сейирсинесе. Сергей Бабенко сохталарын агъачха оюу салдыргъан бла бирге, бош затлада ариулукъну кёре билирге, ким да сейирсинирча затла этерге юретеди.
Сергей Бабенко 1967-чи джыл Черкесскеде туугъанды. Шахарны 13-чю номерли школунда окъугъанды. Фахмусу да эртде огъуна ачыкъланнганды. Ол макраме (къалын халыдан тюйюмчекле этиб эшиу), кулонла, тюрлю-тюрлю сейир затчыкъла этиб тургъанды. Тёртюнчю классда Сергейге сувенир бычакъчыкъны саугъагъа бередиле, ол бычакъчыкъ бла кеси агъачдан къашыкъ этгенди.
Артда Сергей аскер училищеде окъугъанды. Аны амалтын бош заманы хазна болмагъанды. Алай а, сюйген ишин къояргъа излемегенди. Бир кере панно этеме деб, фанераны къара бояу бла бояб, аны да лезвие бла «къармаб», суратчыкъ этеди. Ротаны замполити этиб, стажировкагъа ашыргъанларында, Сергей, агъачха оюу салыучу уста бла танышады. Ол андан кёб затха юренеди.
Сергей аскер къуллугъун Ярослав областда бардыргъанды. Дивизионда анга панно этерин тилейдиле. Ол да юч кюнню ичинде сейирлик затны этиб, кёргюзеди. Аны ишине къараб: «Серёга джашауда орун аллыкъды, къачан да ётмексиз къаллыкъ тюлдю», – дейдиле.
Маданият бла санатланы колледжине Сергей акъылында- эсинде болмай тургъанлай киргенди. Сергейни къызы ол окъуу заведениеге кириб, ДПИ бёлюмню тамадасы Эмма Лапуговагъа атасыны юсюнден хапар айтханды, ишлерин да кёргюзгенди. Алай бла, Эмма Лапугова Сергейни ишге чакъырады. Андан бери 8 джылны колледжде агъачха оюу салыуну техникасындан дерсле береди.
Агъачха оюу салгъан тынч иш тюлдю, анга фахму да, тёзюм да керекдиле. Агъачдан этилген хазыр затланы кёрсенг а, устаны фахмусуна сейирсинесе. Агъач кесекден быллай ариу зат чыкъгъанына ийнанырынг огъуна келмейди.
Сергей кеси айтханнга кёре, бюгюнлюкде агъачха оюу салыу джангырыб барады. Адамланы кёбюсю ол иш бла кюреширге кёллениб, кеслери джаратхан затланы этиб юйлерин джасайдыла. Алай бла, адам фахмусун кёргюзюрге, ариулукъну дуниясына тюшерге, къайгъыларын, сагъышларын чачаргъа мадар табады.
Маданият бла санатланы колледжинде Сергей Бабенкодан ол ишге юреннген студентлени саны аз тюлдю. Агъачха оюу салыуну техникасына юренир ючюн, келишген агъачны сайларгъа, инструментлени тюз хайырландыра билирге, оюу салыуну мадарларын билирге тыйыншлыды. Уста, материал бла сёлешгенча, аны хар несин да сезерге керекди. Агъачны керексиз джерлерин къората, табигъат салгъан ариулугъун къояргъа тыйыншлы болгъанын уста ариу биледи.
Агъачха оюу салыуну кёб тюрлю техникасы белгилиди. Аланы хар бирини энчилиги барды. Сёз ючюн «Геометрическая резьба» деген техника кескинлиги бла, «Ажурная резьба» тынчлыгъы эмда дженгиллиги бла, «Скульптурная резьба» уллулугъу бла кеслерине тартадыла. Техниканы талай тюрлюсюн билген уста, сейир затла этерге боллукъду.
Алай а, агъачха оюу салыу ол къуру техника усталыкъ тюлдю, уллу хунерлик ишди. Сергей хар бир ишине да джанын, джюрек джылыуун салады. Аны себебли, Сергей этген ишле бир-бирлерине ушамайдыла. Алада табигъатны кючю, адам къолланы джылыулары эсленеди. Сёз ючюн, самшит терекден этилген сюйюмлю киштик, къара къайындан этилген пил, джумушакъ эмда ишлерге тынч джёге терекден этилген ваза ол затлагъа шагъатлыкъ этедиле.
Сергей мастер-резчик болгъаны бла къалмай, устазлыкъ ишни да бардырады. Агъачха оюу салыргъа юретген тынч тюлдю. Алай а, студент юренирге талпыса, ол ишде джетишимли боллукъду. Сергей айтхандан, агъач джаны болгъанчады, ол тийгенинги ангылайды. Ол байламлылыкъны сезген адамны кёб зат этерге къолундан келликди. Усталыкъгъа элтген джол узакъ, тикли болса да, ариу затланы этерге мадар табыу къаджыкъмай кюрешиуню саугъасыды. Бабенко айтханлай, билим алыргъа талпымакълыкъ баргъан джолунгдан тайдырмагъан къыбыламады.

МИХАЙЛОВА Ольга.
«День республики» газет.

 
{jcomments}