Байрым кюн, къыркъар айны 9-да, Нарсана шахарда «Нарзанная галереяда» сейир кёрмюч ачылды – къарачай атла бла ат белинде къазауатха къошулгъан джигитлерибизни суратларыны кёрмючю. Атланы суратларын Ольга Бабенко, Уллу Ата джурт къазауатда джигитлик этген джашларыбызны, къызларыбызны суратларын «Къарачай» газет джыйышдыргъандыла.
Кёрмючню джамагъат къуллукъчу Ёзденланы Шарафатдин къурагъанды.

Бу джолгъа дери къарачай атланы суратларындан кёрмючню былайда, башха джерледе да талай кере къурагъанды Ёзден улу. Бу джол, айтханыбызча, башха тюрлюрек болду. Аны магъанасындан Ёзденланы Шарафатдин былай айтады:
– Уллу Хорламны джууукълашдыра, джигитлерибиз танкалада, самолётлада къазауат этген эселе да, ала биринчи атламларын ат белинде башлагъандыла. Кавалерия аскер бёлекледе да кёб адамыбыз джигитлик танытханды. Аны айтханым, былайда эки тюрлю кёрмюч къуралгъанды, дерге боллукъду – атла бла атлыланы суратларыны кёрмючю. Бизни миллетде атчылыкъгъа уллу магъана берилгенди. Атчылыкъгъа юретген школла уллу орун алгъандыла. Ол себебден ат белинде хар къарачайлы да айлана билгенди.
Джигит аскерчилерибизни суратларын хазырлагъанлары ючюн, «Къарачай» газетни редакторуна, къуллукъчуларына разылыгъымы билдиреме.
Кёзюу-кёзюую бла къарачай атланы суратларыны кёрмючюн «Нарзаная галереяда» къураргъа болушханы ючюн Юферева Викториягъа да уллу джюрек разылыгъымы билдиреме. Быллай ишлени миллетибизни маданиятын кёргюзюрге, къралыбызда миллетлени бирикдирирге, сёзсюз да, уллу юлюшю барды.
Фахмулу поэтибиз Байыланы Саид, атчы Мамаланы Халис дагъыда башхала бу тукъум кёрмючлени уллу магъаналары болгъанын чертиб сёлешдиле.
«Къарачай» газетни баш редактору Къоркъмазланы Салима бу мекямда быллай кёрмючле бардыргъан ашхы адет болгъанын черте: «Къарачай атны Минги Тауну башына биринчи ёрлеген кюнлерине (12.08.1998 дж., 18.08.1999 дж.) эмда Уллу Хорламны 80-джыллыгъына тамам таб келишеди быллай кёрмюч. «Къарачай» газетни 100-джыллыгъына китаб джазгъан сагъатда кёб сурат джыйышдыргъан эдик. Аланы ичинде газетни къазауатха кетген къуллукъчуларыны суратлары да бардыла. Ол суратланы сюйюб къошханбыз кёрмючге», – деди.
Ол джазыучуланы бири къазауатдан къайтмай къалгъан Орусланы Махамет болгъанын, кеси да атлагъа кемсиз болгъанын черте, Орус улуну «Тору атым» деген назмусун окъуду.
Ёзденланы Шарафатдин бирикмекликни, шохлукъну багъалатханын таныта, былайда джашагъан миллетлени, динлени келечилерин чакъырыргъа ёчдю быллай джумушлагъа. Бу джол да тюрлю-тюрлю миллетледен, динледен бар эдиле адамла. Этилген ишге бюсюреу этиб да кёбле сёлешдиле.
«Нарзанная галереян «Нарзанная галереяны» къуллукъчусу Юферева Виктория кёрмючню тамам джан аурутуб джарашдыргъан бла къалмай, ачылгъанына аталгъан къууанчны ариу тукъум бардырды.
Джырчыларыбыз, тепсеучюлерибиз – «Бора», «Юность Карачая» деген ансамблле – бютюн джарыкълыкъ къошдула байрамгъа.
Ма бу кёрмюч ачылгъан кюн джюзле бла адамла атланы, ат белинде къазауатха къошулгъан джигитлерибизни суратларына сейир болуб къарай эдиле. Аны бла бирге, алайда байрамгъа джарыкълыкъ къошхан джырчыларыбыз бла, тепсеучблерибиз бла суратха тюше эдиле, къарачай джырлагъа, тепсеулеге сюйюб къарай эдиле. Сёзден, 88 джыл болгъан акканы Джуккаланы Бийбертни джырлагъанын бек джаратыб, къайда тынгыларгъа боллукъду деб, соргъанла да болгъан эдиле.
Сёзсюз да, маданиятыбыз бла да, тин байлыгъыбыз бла да тышындан келгенлени шагъырей этерге уллу себеб боладыла быллай ишле. Аны бла бирге миллетле арасы тин байламлылыкъны бегитеди. Бютюн да бек, былайгъа, бу курорт шахаргъа, солургъа адамла къралны «джети этегинден» келгенлерин эсге алсакъ, миллетибизни атын не къадар иги бла айтдырлыкъ ишле этилгенине къууанырчады.

Къаракетланы Тамара.

 
{jcomments}