Махар ёзен Къарачай районда Учкулан элден 20 километрге ёргерекде орналгъанды. Махар сууну эки джаны бла барыб, Дууут сырт узунну тюбюн алады. Ол табигъатны сейир заповеднигиди.
Мында тамаша, джангы къуралгъан сагъатындача тургъан, кийик джер иги кесекди. Уллу таула, бузла, къалын чегетле, дженгил баргъан чокъуракъ суула, чучхурла, таза кёлле, дуниягъа белгили нарзанла кёбдюле. Кесерге тыйгъыч салыннган, буруннгу, къалын ёсген тис терекле бардыла. Ала, былайда джюз джылланы ёсюб, регионну экологиясын тазалайдыла, саулукъгъа хайырлыдыла. Тис тереклени тизими 17 гектар джерни алады, анда 600-ге джууукъ терек барды. Быллай хазна бизни региондан башха джерде джокъду.
Тенгизден 2200 метр мийикликде орналгъан, онла бла километрлени баргъан, бу таурухлу ёзенни байлыгъы уллуду. Ёзенни тюбюнде кёб тюрлю ариу гокка ханс ёседи. Аланы ичинде азалия, сары родендрон дагъыда башха ёсюмлюкле бардыла. Уллу кёл эмда Гитче кёл деген джыйылгъан суула мийик тау джерледе къуралгъандыла. Джазда толуб келген Махар чучхур да аламатды. Аны тёгереги, бир тюрлю бир ариулукъ къурагъан ханс ёсмеген къысыр къаяладыла. Аланы бир къауумуну мийиклиги 3700 метрге дери джетеди. Былайда болгъан мийик таула бла къаялагъа, бузлагъа, къарлагъа хоншулукъда гоккаладан толгъан тау джайлыкъла бардыла. Бу джерни нарзанлары да адамны саулугъун бегитедиле, багъадыла. Алада кёб тюрлю хайырлы химия элемент барды. Сёз ючюн, къурамында сульфат-гидрокарбонат, натрий, магний, кальций болгъан таза суула ашхынны, ичегилени джараларын сау этедиле. Бауургъа, къууукъгъа джарайдыла.
Туристле, башхала да бу ёзеннге сюйюб барадыла. Ала, таза хауадан солуб, чокъуракъ сууладан ичиб, рахатлыкъны, мамырлыкъны тёрюнде зауукъ этиб, солуб, саулукъларын бегитиб къайтадыла.
Лепшокъланы Хусеин.




