Къарачай-Черкесияда уллайгъан адамлагъа джораланнган энтда бир аралыкъ ачылгъанды. Ол Гитче Къарачай районда орналгъанды. Белгилисича, бу тукъум аралыкъла Эресейни Социал фондуну Къарачай-Черкес бёлюмюню тамалында ишлейдиле.

Ары джюрюген джыллары келген, пенсиягъа чыкъгъан адамладыла. Бютюн да аслам эс джыллары келгенлени финанс джаны бла билимлерин ёсдюрюуге эмда компьютер бла хайырланыргъа юретиуге бёлюнеди. Бу аралыкъда кёб затдан хапарлы болур мадар барды: электрон халда тюрлю-тюрлю джумуш этерге, керекли эмда ышаннгылы информацияны табаргъа, кесинги эмда рысхынгы аманлыкъчы къауумдан сакъларгъа боллукъду.
Тамада тёлюге джораланнган аралыкъ не джаны бла да таб джарашдырылгъанды. Былайда болмагъан зат джокъду, деген уллу джангылылкъ тюлдю. Онлайн эмда офлайн халда лекцияла бардырыргъа мадар барды.
Билимин ёсдюрюрге эмда иги солургъа излегеннге, ол таблыкъ да бериледи. Телевизор ишлейди, интернет бла байламлы компьютер барды, библиотека бла хайырланыргъа боллукъду, шашка, шахмат, башха оюнла кёбдюле.
Аралыкъгъа джюрюгенлеге магъаналы лекцияла, семинарла, мастер-классла теджеледиле. Къол иш бла кюреширге да, китаб окъургъа да таблыкъ барды.
– Джыллары келген адамла, былайда эрикгенлерин кетерген бла къалмай, джашауларын сейир эмда джарыкъ этерге боллукъдула. Сюйген билим аллыкъды, сюйген ушакъ этерикди, кесини хунерлик фахмусун ачыкъларгъа мадар табарыкъды, – деб чертгенди КъЧР-ни Социал фондуну тамадасы Аслан Озов.

 
{jcomments}