«Яндекс Переводчик» деген сервисде Эресейни миллетлерини тиллерини санына къарачай-малкъар эмда къабарты-черкес тилле къошулгъандыла. Ала бла сервисни сайтында, приложениесинде, Яндексни кесинде да хайырланыргъа боллукъду.
Эресейни буруннгу миллетлерини халкъла арасы онджыллыгъын бардырыуну тамалында 2023-чю джылны аягъында «Дом народов России» ФГБУ бла Миллет ишлени хакъындан федерал агентство да къошулуб, Яндексни сервислеринде Эресейни миллетлерини тиллерин сакълаугъа, айнытыугъа джораланнган проект толтурулуб башланнган эди. Ол проектни тамалында эмда Къарачай-Черкесияны Правительствосуну джакълыгъы бла, «Яндекс Переводчик» сервисге республикада джашагъан эки миллетни тили къошулгъанды.
Бу уллу иш КъЧР-ни Миллет ишлерини, кёбчюлюк коммуникациялары бла басмасыны хакъындан министерствосуну башчылыгъы бла баджарылгъанды. Проектни илму джаны бла толтуруугъа Х. Хапсироков атлы Къарачай-Черкес гуманитар тинтиу институтну алимлери къошулгъандыла.
«Бизни тиллерибиз «Яндекс Переводчик» сервисге киргенлери къуру технология джаны бла джетишимли тюлдю. Ол ана тилни билирге, аны кенг джаяргъа, миллетлени маданиятлары бла шагъырей болургъа, тёлюлени арасында байламлылыкъны бегитирге болушхан мадарды. Энди биз, заманны излемине келишген джангы мадар бла хайырланыб, бир-бирибизни эшитирге, окъургъа боллукъбуз. Бюгюнлюкде абаза эмда ногъай тиллени да «Яндекс Переводчик» сервисге къошуу бла байламлы иш барады», – деб джазгъанды МАХ мессенджерде кесини каналында КъЧР-ни Башчысы Темрезланы Рашид.
Бютеулей да «Яндекс Переводчик» сервисде Эресейде джашагъан 14 миллетни тили барды. Проект толтурулуб башланнган джыл бла тенглешдирсек, ол кёргюзюм эки кереге кёбдю. Айтыргъа, проект толтурулгъан кёзюуде «Яндекс Переводчик» сервисге бютеулей да Эресейни 20-дан аслам миллетини тили кирликди. Яндекс, текстни кёчюрген бла къалмай, адамны сёлешгенин ангылагъан, аны сёзле бла джазгъан технологиялагъа да ёсюм алдырады. Бюгюнлюкде ол технология тёрт тилге – татар, башкир, чуваш, удмурт тиллеге – сингдирилгенди.
«Республикабызны миллетлерини тиллерин ол сервисге къошуу бизге уллу джетишимди. Биз XXI-чи ёмюрню цифра технологияларына ата-бабаларыбызны ауазларын, тауларыбызны тауушларын къошханбыз дерге боллукъду. Ёмюрледен бери Минги Тауну этегинде джашаб, ана тиллеринде сёлешиб тургъан миллетлени тиллери «Яндекс Переводчик» сервисге къошулгъандыла. Аны себебинден, миллетлени тин байлыкълары, ана тиллери сакъланныкъдыла. Сабийлерибизге да бу ашхы ишни хайыры уллуду», – дегенди КъЧР-ни миллет ишлерини, кёбчюлюк коммуникациялары бла басмасыны хакъындан министри Мурат Есенеев.




