Байрым айны 3-де «Россия» деген халкъла арасы кёрмючню-форумну площадкасында Туризмни кюню бардырылгъанды. Алайда Къарачай-Черкес Республикадан турист эмда тарих-маданият джаны бла кёб иги зат теджелгенди.

«Адамла кёрмючде болгъан затны кёргенден сора да, бир-бирине ышара, джумушакъ, ариу сёлеше, хал сейир тюрсюн алгъанды. Былайда хар адам республикабызны тарихини юсюнден кёб ашхы зат кёрюрге мадар табханды. Кёбле табигъат, маданият байлыкъларыбыз бла, миллет тепсеулерибиз бла шагъырей болгъандыла. Тау къонакъбайлыкъны сезгендиле. Биз биригиб, келген къонакълагъа, бизде кёб миллетли Къарачай-Черкесияда джюрюген адетдеча, джарыкъ тюбедик», - деб джазгъанды КъЧР-ни Башчысы Темрезланы Рашид кесини Телеграм-каналында.
Былайда регионну стендинде дизайнер-модельер Аджиланы Зарема мастер-класс кёргюзгенди. Ол инджи тигиуню лагъымлары бла шагъырей этгенди. Аны тышында миллет тепсеуден да мастер-класс бардырылгъанды. Андан сора экспозициягъа келген къонакълагъа деб, регионну белгили артистлери аламат концерт къурагъан эдиле. Махтаулу гид-экскурсиячы Хубийланы Шамил республикабызны тарихини, маданиятыны юсюнден, туризм джанындан, хар адам да ангыларча, аламат хапар айтыб, адамлагъа кёб ашхы зат кёргюзгенди. Ызы бла джыйылгъанлагъа соруула соргъандыла, тюз джууабла бериб хорлагъанланы республикабызны курортларында – Доммайда, Архызда, Тебердиде – солургъа сертификатла бла саугъалагъандыла. Ол заманда, джыйылгъанланы джюреклерине джарыкълыкъ бере, Алибек Алибеков бла Мухаменур Султанов миллет къобузла бла миллет музыка согъуб тургъандыла.
«Бизни къонакъларыбыз программагъа къарагъан бла къалмай, анга кеслери да къошулгъандыла. Мастер-класслада, миллет тепсеуледе усталыкъларын кёргюзгендиле. Быллай сейир программадан сора къонакъла бери экинчи, ючюнчю кере да келиб Къарачай-Черкесияны ариулугъуна, миллет байлыгъына къараргъа излегенлерин билдиргендиле. Биз аланы излемлерине разыбыз. Бизни аламат табигъаты, хауасы болгъан Къарачай-Черкесия аланы сейирсиндирлигине толу ийнанабыз», - дегенди КъЧР-ни Башчысы.
Аны тышында Туризмни кюнюнде «Россия» деген кёрмючде пленар санагъат сессия баргъанды. Ол 2020-чы - 2023-чю джыллада бу санагъатда этилген ишлени ахыр эсеблерине, джетишимлерине аталгъанды. Анда экспертле джетишимледен сора да, кърал болушлукъну юсюнден айтхандыла. Аны кючюнден Эресейде ич туризмни ёсюмю тири джюрюш алгъанды.
Кёрмючню ишине Эресей Федерацияны Правительствосуну Председателини орунбасары Дмитрий Чернышенко бла экономика ёсюмюню министри Максим Решетников да къошулгъандыла.
Дмитрий Чернышенко чертгенден, туризм бусагъатда эресейчи экономиканы дженгил ёсюм алыб баргъан санагъатларыны бириди. Къралыбызны Президенти Владимир Путинни аманаты бла бу санагъатха терен эс бёлюнюб, туризмни ёсюмюне джангы мадарла къуралгъанлай турадыла. Алай бла Къарачай-Черкесия озгъан джыл туризмден алчыланы бири болгъанды. Аны курортларында 2, 1 мелиуан турист солугъанды. Ол 2022-чи джылдан 10 процентге кёбдю.
Аны тышында Эресей Федерацияны Правительствосуну Председателини орунбасары Дмитрий Чернышенко, экономика ёсюмюню министри Максим Решетников, Къарачай-Черкес Республиканы курортла бла туризмден министри Текеланы Расул «Архыз» курорт бла «Руслет» компанияны арасында этилген кесаматха къол салгъандыла.

КъЧР-ни Башчысыны эмда Правительствосуну пресс-къуллугъу.