Быйыл байрым айны 18-и халкъла арасы «Эресей» кёрмючде-форумда окъуу-билим берген санагъатха аталгъан эди.

КъЧР-ни Окъуу бла илму министерствосуну къуллукъчулары Къарачай-Черкесияны стендинде хазырлагъан программаларын кёргюзгендиле. Ол да бу затладан къуралгъанды: инджи тизиуден, суу ташладан джазыула этиуден, интерактив халда сурат салыудан, фарфор табакълада витраж халда джазыула этиуден, аскер къаугъагъа къошулгъан аскерчилеге саугъагъа наборла джарашдырыудан мастер-классладан. Аны кибик анда эл мюлк техниканы макетлеринден къуралгъан кёрмюч, Къарачай-Черкесияда джашагъан халкъланы ана тиллеринде чыкъгъан окъуу китабланы кёрмючю эмда регионну туристле джаратхан джерлеринден хапар айтхан викторина да орун алгъандыла.
Къарачай-Черкесияны экспозициясына къарагъанланы ичлеринде Эресей Федарацияны окъуу министри Сергей Кравцов да болгъанды. Ол спецоперациягъа къошулгъан джашлагъа хазырланнган саугъа наборланы джаратханын билдиргенди. Аланы республиканы сохталары кеслерини къоллары бла этгендиле. Ол саугъаланы биргелерине сабийле Ата джуртубузну къоркъуусузлугъун сакълагъан аскерчилеге бюсюреу этиб джазгъан письмола да кетерикдиле. Аланы хар биринде кёб джылы сёз барды. Ол зат аскерчилени джюреклерине балхамча джагъыллыгъына сёз да джокъду.
Окъуугъа, билимге аталгъан кюн «Эресей» кёрмючде-форумда Къарачай-Черкесияны делегациясы да болгъанды. Анга КъЧР-ни окъуу бла илму минстри Инна Кравченко башчылыкъ этгенди. Делегацияны къурамына КъЧР-ни Окъуу бла илму министерствосуну къуллукъчулары, школгъа дери учреждениелени, школланы, орта усталыкъ билим берген организацияланы келечилери киргендиле. Ала барысы да Къарачай-Черкесияны стендин джарашдырыргъа тири къошулгъандыла.
Окъуу бла билимни кюню, айхай да, къууанч халда ачылгъанды. Анда, ВДНХ-да, Эресей Федерацияны Правительствосуну Председателини орунбасары Татьяна Голикова да болгъанды. Татьяна Голикова бла Сергей Кравцов окъуу санагъатда джетишимлени эмда аны аллында тургъан борчланы юслеринден айтхандыла.
Ёсюб келген тёлюлеге терен билим бериу эмда аланы кирсиз иннетде юретиу келир заманнга къайгъырыу болгъанын чертгендиле. Бу ишни юсюнде устаз коллективле кючлерин-къарыуларын аямай кюреширге борчлудула.
- Бюгюн бизни уллу къралыбызны хар адамы да эс бёлюрча бир кюндю. Анга да сейирсинирге керек тюлдю, нек десенг, окъуу-билим келир заманны ачхычыды. Окъуу-билим бериу бизде тыйыншлы дараджадады, кесине базарчады, аллына таукел атлайды. Бу санагъатдан къралны 146 мелиуан адамы тышында къалмайды, демесек да, 80 мелиуан адамы аны бла къысха байламлыды. Ала сынгар окъуу-билим алгъан сабийле эмда джаш адамла тюлдюле, аланы аталары-аналарыдыла, къарт аталары-къарт аналарыдыла, аланы иш бла баджаргъанладыла, окъуу-билим джаратхан ашхылыкъла бла хайырланнганладыла. Окъууну-билимни файдасы тиймеген адам джокъду.
Устазланы юсюнден айтсакъ, ала сау бир уллу аскер бардыла, ала бизни сабийлерибизни окъутадыла, ёсдюредиле, юретедиле, билим-сынам бередиле, - дегенди Эресей Федерацияны Правительствосуну Председателини орунбасары Татьяна Голикова.