Сабийликден урунуугъа берилиб, тутхан ишин тыйыншлы дараджада толтурургъа талпыб, алгъа баргъан уланланы бириди Джанкёзланы Ибрагимни джашы Магомет. Акъыллы кёзлери тёгерекни аулай, дуниягъа алгъыш айтхан керти таулугъа быйыл 80 джыл толады.

Магомет 1946-чы джыл къыркъар (август) айны 29-да Къазахстанда Джамбул областны Свердловск районуну Будёновка элинде Ибрагимни урунууну багъалатхан юйдегисинде туугъанды. Ол 4-чю классны бошагъан кёзюуде къарачай халкъгъа Джуртуна, Кавказгъа, къайтыргъа эркинлик бериледи. Джанкёзланы юйдегилери да миллет бла бирге къайтыб келиб, Акъ Къала элге тюшеди. Магомет атасыны элинде орта школда билим алады. «Мара» совхозгъа ишге джарашыргъа баргъанында, мюлкню тамадалары аны трактор джюрютюрге юренирге Эркин-Шахаргъа окъургъа иедиле. Ол, анда окъууун джетишимли бошаб, 1964-чю джыл «механизатор широкого профиля» деген къагъыты бла ызына совхозгъа келиб, ишге джарашады. Тюрлю-тюрлю маркалы тракторланы уста джюрюте, мюлкню къыйын джерледе этиллик джумушларын тыйыншлысыча толтура тургъанлай, окъугъан джеринден устала келиб, аны къоймай целинагъа элтедиле. Таулу джаш анда Целиноград областны, «Киев» атлы совхозунда комбайналада, тракторлада, атын сый бла айтдырыб, юлгюлю урунады. Анга анда Хурмет грамота бередиле. Ол заманда ары Къарачай-Черкесиядан сау эшелон баргъанды. Къарачай джашла не тюрлю къыйын ишни да белгиленнген дараджадан кёбге толтура, миллетни, кеслерини атларын да махтау бла айтдыргъандыла.
Магомет, анда 3 айны ишлегенден сора, ызына «Мара» совхозгъа къайтыб, усталыгъыны юсю бла уруна тургъанлай, аны аскер комиссариат чакъырыб, шофёр усталыкъгъа окъутуб, Совет Аскерге алады. Ол анда да джууаблы борчун махтау бла толтуруб къайтады. Джаш устаны ызына ишге аладыла. Талай джыл ишлегенден сора, Московский посёлокну теплицаларында шофёр болуб ишге джарашады. Мында тюрлю-тюрлю къыйын джумушланы сый бла толтура, атын иги бла айтдырыб урунады. Совет Союзну кёб тюрлю уллу шахарларында болады. Сёз ючюн, 20 тонна джюкню ташыгъан уллу машинасы бла Москвадан теплицалагъа келтирилирге керекли темир-бетон затланы эмда башха джюклени ташыйды. Ишлене тургъан кёб фатарлы юйлеге кёб къурулуш материал келтиреди. Куйбышевден, Волгограддан, юйлени башларына къуюлургъа джарагъан, къара чайыр ташыйды. Анга салыннган планны артыгъы бла толтура, былайда 12 джылны ишлейди.
Джанкёз улу алайдан ызына, ишлеб кетген совхозуна къайтыб, къыйын, тау джоллада мюлкню къошларына, фермаларына, бёлюмлерине джюк ташый, кече-кюн демей, джигер уруннганлай турады. Ол силосну, комбикорманы, гардошну, тахта кёгетлени дагъыда башха затланы керекли джерлеге элтеди. Онгсузгъа, инджилгеннге, болушлукъ кереклиге къайгъыра, кёб адамдан бюсюреу табханды. Тюрлениулени заманы болуб, мюлкле чачылгъанларында, Къарачай шахарда «Водоканалда», ишлеб турады. Алайдан, 2002-чи джыл, Къарачай-Черкес кърал институтха кёчюб, анда адамла кирген-чыкъгъан пунктда джорукъну сакълауда ишлейди. Тутхан ишин сый бла толтургъан таулу уланны алайдан институтну спорт факультетине агъач уста этиб, ишге кёчюредиле. Магомед анда да, тутхан ишине тири джюрюш береди. Студентле окъугъан бёлмелеге айланыб къараб, терезе, эшик, стол, шиндик, башха затланы тинтиб, сыннганны, чыкъгъанны тюзетгенлей турады. Аны андан сора да факультетни джылыу берген системасына да джууаблы этедиле. Бу ишге да толу берилиб, тыйыншлы дараджада баджарады. Джылы келсе да, ишин джарсытмагъан, деменгили толтургъан джигер адам, былайда да 23 юч джыл ишлеб, быйыл 80 джыл толуб, тыйыншлы солуугъа чыкъгъанды.
Ол, тутхан ишинде кёргюзген джетишимлери ючюн, талай Хурмет грамота эмда Бюсюреу къагъыт бла саугъаланнганды.
Джангы Къарачай элни башчысы Махаметланы Аслан теджеб, Джанкёз улуну Къартланы Советине тамада этедиле. Фахмусу, бай сынамы болгъан джигер элчи, уллу элни джамагъатыны ишине, джумушуна толу къошулады. Ол, башха джууаблы адамла бла бирге, белгиленнген ишлени баджара, элчилеге терен къайгъыра, аланы социал-экономика болумларын ёсдюре, турмуш джашауларын иги эте, уллугъа сый бере, гитчеге юрете, тюрлю-тюрлю тюбешиуледе сёлеше, арада къарнашлыкъны, шохлукъну кючюн бегите джашайды.
Магомед Байрамукъланы Хызырны къызы Зарема бла джашауун бир этгенди. Аланы 2 сабийлери барды. Тамара Ставрополдагъы устазла хазырлагъан институтну тарих факультетин тауусуб, Черкесскеде усталыгъыны юсю бла ишлейди. Баш категориялы устазды. Аны уллу джашы СВО-дады.
Ахмат Къарачай-Черкес кърал университетни физика-математика факультетин джетишимли тауусханды. Бусагъатда Минск шахарда усталыгъыны юсю бла ишлейди.

ЛЕПШОКЪЛАНЫ Хусеин.

 
{jcomments}