2014-чю джылдан бери Украинаны башчылыгъы (Петр Порошенко, бусагъатда Владимир Зеленский) сёз бегитилгенине да къарамай, кесини халкъына эмда бизни къралгъа къаршчы къаллай къуджур ишле бардырыб турду. Айхай да, бир кюн бир тёзюм да тауусулгъан этеди. Сау сегиз джылны кюрешди Эресейни башчылыгъы, «былай этмегиз Минскеде сёз бегитиуню (Минское соглашениени) излемлерин толтуругъуз», дегенни айтыб, рахатлыкъгъа чакъырыб. Бир да, бир да болмады, ангыларгъа излемеди Украина джаны. Болмагъанында, Президент Владимир Путин, къралны башчылыгъы бла да кенгешиб, тутуб алды да таукел атлам этди. Донецк Халкъ Республика бла Луганск Халкъ Республиканы кеси башына оноулу субъектле болгъанларын мюкюл этди, ызы бла уа аскер кюч бла бардырылгъан спецоперацияны башлады. Ол Украинаны тюз халкъына къаршчы баргъан иш тюлдю, бизни къралгъа къаршчы ууланнган, андагъы джамагъатха да зулму этиб тургъан аскер кючню къабына джыйыугъа джораланнган операцияды. Барыбыз да билебиз НАТО-гъа кенг эшик ачаргъа излегенлени иннетлерин. Аны ангыларгъа керекбиз къайсыбыз да.
Меннге 87 джыл болады, кёб джылланы тарихден дерс бериб тургъан эски устазладанма. Арт кёзюуде, 20-дан аслам джылны, джамагъат иш бла кюрешеме, айтхан затымы билиб айтама. Джамагъатны ичинде провокациялагъа кесин терилтирге хазыр тургъан адамла къачан да болгъандыла, бюгюн да бардыла. Аллайланы джалгъан сёзлерине ийнанмагъыз, кесигизни алдатмагъыз. Мен окъутхан алгъыннгы студентлеге, мени таныгъан бирси джердешлериме тилеб айтама - ала-чола хапарлагъа тынгыламагъыз, орам хапарны эшитгенлей телефонну алыб, аны тёгерекге джайыб тебремегиз. Аскерчиликни, къазауатланы юслеринден кёб затны окъугъан тарихчича айтама, ийнаныгъыз, НАТО-ну аскер базаларын тюз бурун тюбюгюзге келтириб къургъан болсала (Аллах сакъласын) кишиге да игилик этерик тюлдюле, бютюн да бек уруннган халкъгъа. Ол бизни къралны, Украинаны, башхаланы да къоркъуусузлукъларына къатылгъан къыйынлыкъ иш боллукъду.
Дагъыда, къаугъадан къоркъуб, юйюнден-кюнюнден чыгъыб айланнганла бизни таба келселе, алагъа да къолубуздан келгенича болушургъа керекбиз. Ол инсанлыкъ борчубузду. Къазауат салгъан джараланы кёрген, кёчгюнчюлюкню къыйынлыгъын сынагъан тёлюню адамыма мен. Унутмагъанбыз киши джуртда бизге къарнашлыкъ къолун узатханланы.
Алайды да, джанларым-кёзлерим, бусагъатда Украинада бола тургъан ишлени тюзюча ангылайыкъ, кёб турмай рахатлыкъ орналырына ийнанайыкъ, Аллахдан тилейик. Узун сёзню къысхасы, Эресей къралыбызны тыш политикасын мен тюзге санайма, барыгъызны да анга чакъырама. Тюз оюм этиучюле болайыкъ.
Хубийланы Гитче,
Гитче Къарачай районну администрациясында
къартланы советини председатели.
