Къарачай-Черкес Республиканы Башчысы Темрезланы Рашид РФ-ны Шимал Кавказны ишлерини юслеринден министрини биринчи заместители Одес Байсултанов бла тюбешгенди. Ол республикагъа ишни юсю бла келгенди – Къарачай-Черкес Республикада биринчи инвестицион форумну эмда «Инвестируй в Кавказ» деген бизнес-сессияны ишлерине къошулургъа. Аланы Къарачай-Черкес Республиканы Экономика ёсюмюню министерствосу бла Минкавказ биргелей бардыргъандыла. Тюбешиуню кёзюуюнде «2025-чи джылгъа дери Шимал Кавказны ёсюмю» деген кърал программаны джергили подпрограммасы къалай баджарылгъанындан сёз баргъанды. 2016-чы джыл республикада проектле иги толтурулгъанларын, быйыл да кёргюзюмле аман болмазлыкъларына ышанмакълыгъын билдиргенди Одес Хасаевич. Кърал программагъа кирген юч проектни да джашаугъа тири сингдирилгенлерин чертгенди Минкавказ.
Аны кибик Темрезланы Рашид бла Одес Байсултанов Къарачай-Черкесияда энчи экономика зонаны ишини юсюнден да оюмлары бла алмашыннгандыла. Мындан ары да энчи экономика зонаны рамкаларында Минкавказ бла биргелей ишни бютюн да къурамлы бардырыргъа келишгендиле.
Биринчи инвестицион форумну кёзюуюнде Темрезланы Рашид инвестицион чакъырыу этгенди. Анда былай айтылады. «Къарачай-Черкес Республикада быллай форум джыл сайын бардырылыр деб ышанмакълыкъ танытама. Бизнес бла властны арасында ачыкъ сёлешиу бизнес бла кюрешген адамлагъа джол ачарына, инвестицион политикада аслам эсни не затха бёлюрге кереклисин ачыкъларгъа болушуруна сёз да джокъду. Къарачай-Черкес Республиканы айнытыр ючюн, бусагъатда бизде болгъан производстволагъа джол бериудю. Джангы производстволаны ишлеудю. Республиканы джамагъатына джангы иш орунла къурауду. Бюгюн биргелей ишлеуню баш магъанасын мен ол затда кёреме.
Быйыл Къарачай-Черкес Республика кесини къуралгъаныны 25-джыллыгъын белгилейди. Ол кёзюуню ичинде Россия Федерацияны Правительствосундан эмда федерал структураладан джакълыкъ табыб, регионал властланы кючлери бла социал экономика болумну игилендириу джаны бла кёб зат этилгенди. Бу затда предприниматель иш бла кюрешген бирлешликлени юлюшлери уллуду. Ала кеслерини бизнеслерин тюз къурай билгендиле. Налогларын заманында тёлейдиле. Адамланы джангы иш орунла бла баджарадыла. Бюгюн былайда мен алагъа джюрек разылыгъымы билдирирге излейме. Бюгюнлюкде, бютеу Россия Федерациядача, Къарачай-Черкесияда да экономика ёсюм джангы фазагъа киргенди. Ол зат инвестицион политикагъа джангы кёзден къарауну излейди. Къарачай-Черкес Республикада бир-бири бла байламлы иш джюрютюу система къуралыргъа керекди. Хар районда, хар шахарда мадарла да, ресурсла да бирча тюлдюле. Мен аны ангылайма. Алай а хар территорияны кесини алгъа элтген бир заты барды.
Муниципал районла бла шахарланы башчылары, инвестицияланы илешдирир ючюн, бютеу кючлерин-къарыуларын салыргъа керекдиле, нек десенг, ол затсыз экономика аякъ тиреяллыкъ тюлдю. Бюгюнлюкде бу джаны бла муниципал къуралышланы башчыларыны джетишимлери аман тюлдюле. Алай а ала андан да таукел эмда тири къымылдаргъа керекдиле».
Инвестицион форумда Къарачай-Черкес Республиканы Башчысы Темрезланы Рашид этген инвестицион чакъырыуну юсюнден келир номерде толуракъ хапар берликбиз.
