Байрым (февраль) айны 1-де Къарачай-Черкесияны кърал филармониясында урунууну къоруулаугъа аталыб, сабийлени араларында бардырылгъан сурат конкурсда хорлагъанлагъа аталгъан къууанч джыйылыу болду.

Урунууну къоруулауну суратлаб, конкурсха республиканы бютеу шахарларындан, районларындан сабийле къошулгъан эдиле.
«Охрана труда глазами детей» деген конкурсда джетишимли болгъан сабийлени саугъалаугъа аталгъан джыйылыуну ача, КъЧР-ни Правительствосуну Председателини орунбасары Гербекланы Ирина: «Урунууну къоруулау, аны таб къурау уллулагъа джараулу информацияды. Бюгюн ол теманы сабийле суратлагъандыла. Ала гитчеликлеринден ишлерик джерлери къалай джарашдырылсала къоркъуусуз боллугъун ангылагъанлары бек игиди. Бу конкурсха къошулгъан сабийле бек азмычладыла»,- деди.
Конкурсха 316 сурат теджелген эди. Теджелген ишлени авторланы джылларына кёре 2 къауумгъа юлешиб къарагъандыла. Жюри, суратланы тематикагъа келишгенлери бла къалгъанларын, ариу салыннганларын сюзюб, 45 сабийни ёчлю орунлагъа тыйыншлы кёргенди.
Сурат конкурсну алчыларыны бири Ёзденланы Амин: «Мен сурат салыргъа бек сюеме. Конкурсха теджеген ишими киши болушдурмай этгенме. Къоркъуусузлукъну бегитиуге тыйыншлысыча эс бёлюб, кесибизни да, башхаланы да сакълай билирге керекбиз деб, келеди кёлюме», – дейди.
СОЛТАНЛАНЫ З.