Багъалы ветеранла, тылда ишлегенле, хурметли джердешле!
Къралыбызны баш байрамы бла - Хорламны кюню бла – барыгъызны да таза джюрекден алгъышлайбыз!

Уллу Ата джурт къазауат тохтагъанлы 79 джыл озду. Алай а ол халкъны эсиндеди – аны ууу джетмеген бир юйдеги къалмагъанды. Ма аны ючюн, арадан джылла, ёмюрле кетселе да, 9-чу Майны эресейчилени хар бири эм магъаналы, ачы джауну хорлаб чыкъгъан халкъны эм бек бирикдирген байрамгъа санагъанлай турлукъду.
Хорламгъа Къарачай-Черкесия да тыйыншлы юлюш къошханды. Аны 46 минг уланы бла къызы кетгендиле фронтха. «Мор эминаны» джер башындан къурутур ючюн баргъан къанлы урушлада кёбле джан бергендиле. Джердешлерибизни джигитликлери тёлюлеге юлгюдю. Дуниядан кетген ветеранларыбызны, бюгюн башы сау фронтовиклерибизни хар бири бла ёхтемленебиз. Халкъ сау болуб ала унутуллукъ тюлдюле.
Бу джарыкъ байрамда ветеранлагъа, тылда бел тюзетмей ишлегенлеге джюрек разылыгъыбызны билдиребиз. Сизни - эркин, кючлю къралда джашаргъа бизге насыб бергенлени - аллыгъызда бёрк алабыз. Биз сизге борчлу болгъанлай джашарыкъбыз! Ызыбыздан джетиб келген тёлюню аллында борчубуз а баш кёлтюрюрге излеген неофашизмни джолун кесиудю. Бюгюнлюкде аскер къаугъагъа къошулгъанла (бизни джердешлерибиз да аланы ичлеринде болуб) Джуртлары ючюн артха турмай сермешген джигит къарт аталагъа ушаргъа, алагъа тенг болургъа тырмашадыла. Ол себебден, Хорлам бизникиди!
Байрам бла, багъалы джердешле! Хорламны кюню бла!

Къарачай-Черкес Республиканы Башчысы
Темрезланы Рашид

Къарачай-Черкес Республиканы Халкъ
Джыйылыууну (Парламентини) Председатели
Иванов Александр
Къарачай-Черкес Республиканы
Правительствосуну Председатели
АРГУНОВ Мурат.