Ингуш бла Къарачай-Черкес республикала къуралгъанлы быйыл сентябрда 25 джыл толлукъду. Ала ол кюн къууанч халда тюберге хазырланадыла.
Ингуш бла Къарачай-Черкес республикаланы культура министерстволары билдиргеннге кёре сентябрны 22-де эки республиканы да белгили артистлери, искусстволарыны усталары эмда творчество интеллигенцияны къуллукъчулары, эки регионну юбилейлерине атаб, Кремлни Кърал Къаласында кеслерини концерт программалырын кёргюзюрюкдюле.
Уллу магъанасы болгъан концерт программагъа КъЧР-ни «Эльбрус» кърал тепсеу ансамбли, республикадан «Алан» фольклор, халкъ джырланы ансамбли, Къазах Республиканы искусстволарыны махтаулу къуллукъчусу, Къарачай-Черкес Республиканы халкъ артисти Арсланбек Султанбеков, КъЧР-ни махтаулу артисти Ачар Меремкулов, КъЧР-ни махтаулу артисти Ярослав Щекланов, Фатима Китаева, Россияны халкъ артисти Михаил Турецкий башчылыкъ этген «Хор Турецкого» деген музыкалы коллектив эмда башха онглу артистле бла творчество коллективле къошуллукъдула.

Кремлни Кърал Къаласыны фойесинде эки республиканы да суратчыларыны, декоратив прикладной искусстволарыны эмда халкъ усталарыны кёрмючлери боллукъду. Андан сора да Ингуш бла Къарачай-Черкес республикаланы социал-экономика джетишимлерини эмда тарих-культура байлыкъларыны юсюнден хапар айтхан стендлени кёрюрге да боллукъдула Москва шахарны къонакълары бла москвачыла. Алада эки республиканы халкъларыны да культура джашауларындан, бурундан келген адетлерини юслеринден хапар айтыллыкъды.

Кобанланы Махмут.